للصبر حدود الجزء الرابع

للصبر حدود الجزء الرابع

وققفت برهبة و لصقت مع الحيط ، قلبي غايسكت .. إطلاق النيران استمر أكثر .. أصوات و صراخ قوي !! شنو واقع .. فجأة عم الهدوء على المكان كأن شيئا لم يكن .. تقدمت بخطوات ثابتة و متثاقلة نحو الباب ؛ رجعت بسرعة لألتصق مرة أخرى مع الجدار ! أصوات أحذية تتقدم بسرعة نحو الغرفة .. أترقب بهلع كانتسنا الباب يتفتح أول مرة يباغثني الخوف ماعرفتش علاش و كفاش !! 
وماهي إلا ثواني معدودة حتى يندفع الباب بقوة ، ماشي هوما !! وجوه غير مألوفة .. شخصان ذوا أجسام ضخمة .. عضلات مفتولة ملامح غربية ؛ بذلة عسكرية و لكن شي حاجة زايدة فيها نعم .. علم ألمانيا في الذراع اليسرى و الصليب في الصدر الجهة اليمنى .. بملامح قاسية وجه ليا الكلام أحد منهم 
الشخص 1 : زيدي تحركي معانا مااعندناش الوقت 
الشخص : نوضي اش كاتفرجي فينا طلقينا قبل مايحاصرونا 
بدون نطق أي كلمة مني أو إعتذار تبعتهم على الأقل هاذو مسيحيين أحن و أرق من اليهود أو بالاحرى مابقيتش حاملة نبقا ثانية وحدة فهاد المكان ، تبعتهم بالجرا خطواتهم كبيرة ! متجهة للمجهول مصير ماعارفاش كيف غايكون .. توكلت على الله و أزلت من بالي كل الأفكار و الوساوس الخبيثة .. غاديا وسط منهم واحد فالأمام و الآخر ورايا ،، غلديين وسط الغابة و فنفس الوقت حاضيين جنابهم و موجهين سلاحهم تحسسا لأي هجوم كما فهمت من هضرتهم !! .. فالباب د الدار عند الخروج كانو الأعوان د جاكسون مطروحين على الأرض ميتيين 
في حين جاكسون ما بان لي تا أثر عليه .. ما عطيتش للأمر أهمية واصلنا الطريق ؛ فجأة كانحس بيد جراتني من جنب واحد الشجرة بقسوة و عنف تا حسيت بيدي غادي تنطر من بلاصتها ، كروشاني بيديه من عنقي و حط السلاح على راسي ، نعم هو ذاك جاكسون ...

جاكسون ( قرب لوذني و همس لي بصوت مقرف بالنسبة لي ) : الغزالة صافي سخيتي بينا أممم هاها ولكن مازال ماخديت منك الحاجة الأهم من المخططات 
فهمتو آش قصد من كلامو ماحسيت براسي إلا و أنا كانقز و نتنطر بين يديه ولكن كان حاكم القبضة مزيان ؛ فوق من هادشي بنيتو قوية رياضية مقارنة مع جسدي النحيل الضعيف و قواي الضعيفة !!
أنا : عمرك تحلم بيها الحقير ماكاتسوااش الله ياخذ فيك الحق طلق منيي 
جاكسون ( موجه الكلام للألمانيين ) : هكا ولا هكا نفرغ فراسها المسدس ، مايتحرك تا واحد فيكم ولا غانفجر لها راسها ..
بقا راجع شوية بشوية و جارني معه رغم محاولتي الفاشلة ، دموع حارة نزلات من عيني ، بكاء في صمت استسلمت ! وكلت أمري لله .. كان عندي بصيص أمل فهاد الجنود الألمان و خاب أملي ، كتمت و كتمت دموعي و ها أنا الآن ضعفت تقهرت ،..
صوت ارتطام قوي على الأرض زلزلني ! جاكسون فقد الوعي و طااح حدايا ، عيني تركزو عليه بصدمة ؟ فجأة لمحت حذاء عسكري دفع المسدس ديال جاكسون بعيد عليه .. بقيت طالعة شوية بشوية يكفي من الصدمات !! سروال عسكري مخلط بالألوان الربيعية .. تيشورت خضراء عسكرية أيضا ،، بنية قوية رياضية ضخمة كما المعهود !! علم ألمانيا شمال الصدر ؛ ولكن أين الصليب ؟؟ لا وجود له .. طلعت راسي و إذا بالمفاجئة .. طاح لي الماء فالركابي دموعي زادو فاضو أكثر من الأول ؛ ماعرفتش واش نندب ولا نبكي و لا نغوت ، ربما تحملت أكثر من طاقتي ولكن قاطعة الشك باليقين أنه لا ! و كيف نعم و ربي قال { لا يكلف الله نفسا إلا وسعها } ..

بلحيته بوجه يعلوه نور ما شاء الله،، لحية كثيفة متوسطة الطول ؛ أثر السجود على جبهته ^^ ،، بالابتسامة التي لا تكاد تفارق شفتيه .. هو ذاك محمد ! فين كان حتى لدابا شنو علاقتو بألمانيا مافهمتش تخربقت ! بمجرد أني شفت فيه هبط عينيه للأرض و تكلم بصوته الرجولي بامتياز ..
محمد : حفصة آا آجي فين غاديا 
ماتسنيتوش يكمل هضرتو و سرحت ممكن تقولو شبه حماقيت ! شنو هادشي لي كيطرا ؟ كيفاش ياك هو كان مع الموساد ؟ مافهمتش .. طلقت رجلي للريح كانجري و ماعارفاش فين غادة المهم أني نبعد منو و منهم كاملين ! عييت حسيت كأني شي لعبة كيحركوها كيفما بغاو .. يد جراتني بقسوة حتا ارتطمت معاه .. محمد !! و عروق العصاب شقو مكانهم لجبهتو و عنقو .. كيخنزر ؛ بمجرد ماوقفت حيد يدو بانتفاض و كيف العادة مهبط عينيه للأرض 
محمد ( بالغوات تا نقزت من مكاني ) : وااش حمقة وباغا تحمقيني معك واش وقت هاذ اللعب د البراهش واش عرفتي شحال تجاوزت د المخاطر باش نوصل ليك أو لا ولكن أنت ديما داك الراس قااصح دابا تحركي قدامي ماعندناش الوقت 
التفت ولقاني مسمرة بلاصتي ! و مخنزرة مابغيتش نحشم .. ولكن مادازش عليا القليل 
محمد : آاش كاتشوفي فيا يالاه تحركي داباا 
ومع ذلك ماباغاش نتزنزن هه الخطر عليا و علينا كاملين ولكن لم أحرك ساكنا 
تا كانحس براسي مرفوعة فوق كتافو !! عاد فقت ..
أنا ( كانضرب و نعض و نقمش و كانغوت ) : طلق منيي نزلني خليني نمووت هنا خير لي معاك الغدار 
مكمل طريقو و غير مهتم .. شفت تا شفت و سكتت 
غادي بالجرا و الجنود الأخرين تابعينا و حابسين الضحكة على منظري !! كانبان كيشي نونوس صغير مقارنة مع الضخم ..

مدة لا تقل عن 15 دقيقة و هو كيجري بيا ماعرفتش فين غاديين !! فجأة وقف و حطني بجهد تا كنت غانطيح .. تأملت البلاصة كانت ساحة كبييرة بحال تيران د الكورة .. و لمحت مروحية هيليكوكتير عسكرية عليها علم ألمانيا ! البيلوط كيشير لنا بمعنى سربيو .. تقدم محمد و تم غادي حتا دار ولقاني باقة فنفس البلاصة ..
محمد : حفصة تحركي ماعندناش الوقت 
أنا : ماغانتحرك معك لتاشي بلاصة حتا تقولي شنو واقع وشكون انت شكوون ؟؟ عييت ما نستفسر و مالقيت تا جواب !! بل دخلت لمتاهة لا مفر منها هاا دوي 
محمد ( بالغوات ) : مااشي وقتو داباا تا لمن بعد حفصة طلقينا راحنا فخطر ولا غانضضطر مرة أخرى نهزك ( خنزر فيا تا زعزعوني دوك الشوفات ) 
أنا ( موجهة صبعي بتهديد ) : إياك تمسني مرة أخرى سمعتي أنت مامنحقكش تحط عليا يديك و لا تاترفع ليا صوتك 
محمد : على أنا بغيت مضطر كون بقينا تماك علم الله آش غايوقع واش الصهاينة غايرحمووك و من الفوق ماكنتش باغي أبداا نقيسك حتا تكوني حلالي إن شاء الله 
عيني خرجو 10 سنتم و فمي تشرع 180 درجة آش كيقول هذا !! عاق آش قال و سكت بصدمة صرط لسانو .. توجه نحو الهيليكوكتير بسرعة فائقة و أنا تابعاه باغا غي نفهم آش قال و شنو المقصود ..
أنا : محمد حبس شنو قلتي آش تاتقصد ؟؟ حبااس جاوبني ..
باقي ماكملت هضرتي ؛ تا كانسمعو مرة أخرى صوت الرصاص ! هوماا الجنود الصهاينة من كل جانب .. البيلوط خدم المحرك و بدات الهيلي كاترتافع من الأرض ،، محمد طلع بسرعة ووجه يديه ناحيتي بمعنى طلقي راسك .. هنا عاد حسيت بالخطر ' بقيت غادية بالجرا و هازا خماري باش مايعكلنيش .. ماهي إلا بضع سنتيمترات تفصلني عن المروحية ؛ فجأة بدون سابق إنذار اخترقا رصاصة ساقي الأيمن على إثرها طحت ...

ألم فظييع بكل المقاييس مابقيتش كانحس بالساق ديالي ! حاولت نوض بدون جدوى رجلي خانتني .. محمد جاي بالجري اتجاهي فجأة وقف مصدوم ! ماالو خاف لا مايمكنش .. بدون سابق إنذار الألم تزاد فهاد اللحظة بزااف و فنفس الوقت حاسة بثقل على رجلي ، غوت ماقدرتش نكتم .. نقلت أنظاري نحو رجلي المصابة و هنا كانت المفاجئة !! جاكسوون الحقير عافط عليها و موجه سلاحو هاد المرة الكلانكشوف على راسي ومع الإبتسامة الخبيثة التي لا تفارق محياه .. عاد عرفت علاش محمد تصرف هكذا .. آاه يا رب كن لي عونا ؛ ماقدرتش نحبس دموعي تارة أخرى ، إرهاب و تعذيب نفسي قبل أن يكون جسدي ' فهاذ اللحظة دعاء واحد كيتكرر بداخلي في أحشائي فكل نبضة ينبضها قلبي " خذني إليك يا رب و اجعل لي جزاءا بما صبرت و اجعل كيد الصهاينة و من أراد بالمسلمين سوءا في نحرهم و اقطع سبيلهم ياا أرحم الراحمين " 
نزفت بزاف و بديت فالتعرق التبوريشة و برودة شديدة دوار و ضباب على عيني ؛ ظنيت أنها نهايتي بديت كانشهد و كانتصور كيفاش غايكون مصيري جنة أم نار 
فيقني من تفكيري جاكسون .. نزل عندي و فنفس الوقت موجه السلاح على راسي 
جاكسون : حشومة عليك تخلي حبيبك بوحدو سخيتي بيا هههه 
أنا : حقيير بعد مني ( قلتها بتعب ) 
جعر و تجاوز حدودو كثر من اللازم !! قبلني و بدا كيتلمس وجهي .. هزيت يدي باش ندفعو ماقديش !! موسخ ماكيسوااش قلبي تزير عليا و زدت فالبكاء عييت يا الله ياا رحمن ..
باااق صوت رصاص مجهد ،، طاحت عليا الجثة الضخمة ديالو ؛ التفتت بسرعة لأجد محمد متوجه لي بسرعة !! ضربو ماعرفتش واش مات أو لا لا ؟؟ آخر حاجة عاقلة عليها محمد هازني و كيجري بيا للهيلوكوكتير تماك غبت رحلت لمكان مظلم لا نور فيه ...

فتحت عيني مرة أخرى غشاوة ضباب عليهم ، كانحس ببرودة شدييدة وتارة أخرى سخونية ، دقات قلبي مرتفعة ؛ في الهيليكوكتير تزاد عليا الدوار !! كانت رجلي مزيرة بتيشورت تأملت مزيان كانت ديال محمد ؛ هزيت عيني و هنا تصدمت *-* ما شااء الله العضلات مطراسية و منفوخة بزااف ، عقت براسي و هبطت عيني لأفقد مرة أخرى وعيي لأستفيق على صوت الأجهزة الطبية و الشمس الساطعة المتسللة من النوافذ .. فيدي السيروم و على وجهي قناع الأكسجين ؛ كانحس بتعب شديد !! عضامي كلها عاطياني الصداع ، كانتحرك بصعوبة ؛ ريقي ناشف لمحت طبيلة صغيرة بالقرب مني فوقها كأس ماء .. مديت يدي بتثاقل و جهد شديد ! بمجرد ماقستو فلت من قبضتي وطاح تهرس و أصدر صوت شديد تسمع فأرجاء المكان .. و ماهي إلا دقائق مرت ؛ تفتح الباب و دخلات ممرضة عرفتها من لبسها ؛ بابتسامة عريضة و ملامح هادئة ! نطقات بصوتها الحنين و الإبتسامة لا تفارق شفتيها .. قالت شي حاجة ولكن مافهمت والو من هضرتها لغة فشكل و معقدة !! ..

كانشوف فيها و مع هضرتها كانحرك ملامحي هه ، شافتني مافهمت والو و بدات معايا لغة الإشارات !! .. بعد جهد كبير باش توصل ليا شنو بغات تقصد أخيرا فهمت .. كل ما في الأمر أنها سولاتني كيف بقيت و باش كانحس حاليا ،، خرجات و خلاتني فدوامة أفكار .. فين أنا و شنو هاذ اللغة باش كاتهضر ماشي الفرنسية ولا الإنجليزية ! 
تلمست راسي و الحمد لله كنت لابسة خمار ولكن ماشي ديالي !! هذا نقي و باقي جديد ، رفعت عليا الإزار باغا نتمشا شوية عييت كأني من زمان هنا ..
بعد برهة من الزمن كنت واقفة فالشرفة و جريت معايا السيروم كانتأمل الجو زوين بزااف هنا .. بلاصة مختالفة ماشي فرنسا ؟؟ جردة ديال المشفى مليئة بالمرضى كل واحد حداه السيروم ديالو الممرضات فكل مكان .. كيتعاملو مع المرضى بحب و حنان و احترام فعلا يستحقن كل الإحترام .. درت باش نرجع للسرير غوت بأعلى ما عندي ، كان محمد متكي على باب الشرفة بكتفو و مربع يديه كيشوف ناحية الجردة بابتسامة لا تفارق محياه لابس سروال قندريسي طخو شييك على طريقة الجينز ،، الفوق لابس تيشورت عليه عبارة " الإبتسامة = صدقة " بلون الأسود و العبارة بالأبيض .. عضلاتو بارزة بزاف و التيشورت مزيرة عليه او بالأحرى نقولو هو لي زير عليها هه .. يالاه حليت فمي باش ننطق و نعاتبو على هاذ الخلعة لي دار ليا ولكن سبقني ! 
محمد : كنت صغير حينها 7 سنين .. الأب ديالي كان عميل سري فالمخابرات الألمانية ...

كان نعم الأب .. عمرو حسسني بشي نقص أو حرمان ، كنت أنا الوحيد عندهم لأن أمي فالولادة ديالي تعرضات لمضاعفات على إثرها تم استئصال الرحم .. ارضاو و قنعو بيا ؛ كانو شخصين مثاليين فحياتي مايمكنش نعيش بلا بيهم خصوصا فسني الصغير ،، باقي كانعقل مزيان على داك النهار كان يوم أحد ، كنت كعادتي كانلعب مع أمي أمام المدفئة .. رن الهاتف لي كان حامل أسوء خبر ليا و لأمي لي ربما مستحيل كنت نتقبلو شي نهار ، حينها الأب ديالي كان مسافر لمدة 7 أيام لتل أبيب المدينة المحتلة من طرف الصهاينة .. كان شي مشكل بين المخابرات الألمانية و الموساد و بما أن أبي كان عميل سري ممتاز فهو لي تولى هاد المهمة بشجاعة ، ماما جاوبات على الهاتف أما أنا كنت منغمس فاللعب حتا فيقاتني صرخة أمي طاحت على الأرض كاتبكي و كاتغوت .. قربت عندها نطلع ونشوف مالها ! عنقاتني و ضماتني بقوة لعندها و زوج كلمات كانو كيترددو على شفتيها : مشا و خلانا آولدي !! 
نوضاتني لبساتني المعطف بحكم كان وقت البرد و هي أيضا لبساتو فوق حوايجها اتجهنا للسيارة و دموعها شلال كسيرات بسرعة .. حتا وقفنا أمام المشفى العسكري هنا فآلمانيا ؛ باقي عاقل على هاذ اللحظة مزيان او بالأحرى عمرها غاتنسا لي .. دخلنا مباشرة لمستودع الأموات !! كانسول ماما و كانغوت و كانبكي ولكن دون جدوى خفت خفت بزااف ؛ جراتني من يدي و دخلنا للثلاجة ديال الموتى .. بقيت واقف كانشوف الطبيب لي حل وحدة و جرها كان شخص ميت مغطي بثوب أبيض ملطخ بالدماء .. ماما انهارت و أنا بقيت مصدوم من هول المنظر و بشاعته ، أبي حبيبي مفصل ليه راسو على الجسد ماات وخلاني مات ( طاحو ليه زوج دمعات ) ..

جروحو فاقت الخيال ! فقط إحساس أنك منبوذ و مقطوع من الشجرة فظييع جداا فما بالك تشوف الأب ديالك تقتل بأبشع طريقة !! كيفاش مخبي هادشي كامل ؟ كيفاش قدر يتحمل خصوصا فتلك الفترة الحساسة ؟ الطفولة لي أي طفل طبيعي كيدوزها لعب ولهو و ضحك آاه هادي هي الدنيا .. فصبر جمييل و الله المستعان ، اختل توازني كدت أسقط جاتني الدوخة و رجلي عاطياني الحريق ؛ سندت بسرعة على الحيط في حين محمد كان متوجه عندي يساعدني .. اعترضت ورفعت ليه يدي بمعنى راني بخير 
- الطفولة عمرني حسيت بيها دوزت أقصى أيام حياتي ! شفت المرار شخال من مرة بكيت فالظلام بكيت فوق وسادتي شحال من مرة احتاجيت لحضن دافئ يحسسني ولو بالقليل من الحب و الحنان ! الأم ديالي من بعد موت بابا رحمه الله تأزمات نفسيا انعزلت عن العالم حتا عليا أنا عشت وحييد مالقيتش لي يوجهني لي يساندني .. عائلة بابا و ماما تاحد ماحن فيا !! كأني عدوهم ، كبرت ووصلت للمراهقة وصلت للمرحلة الحساسة الخطيرة .. انحرفت سلوكيا و فكريا جميع أنواع الخمر و المخدرات جربتهم .. آذيت بزااف دالناس و ظلمت بزااف ( تنهد بعمق ) الله يغفر ليا ..
انفجر بالبكاء ..

الجانب القوي الجدي الغامض لي ألفت عليه محمد تلاشى فرمشة عين ! ذاك الجانب الضعيف لي دائما حاول يخفيه و جاهد ولو أن كولشي واضح من عينيه هاهو خرج ! داكشي كامل لي كتمو و ردو لقلبو ، دابا مامنحقيش نقول أن حياتي كلها عذاب ، مقارنة مع محمد و بزااف د الأشخاص ماشفنا والو و ماذقناش الألم الحقيقي !! .. دموع ساخنة شقت طريقها فخدودي لتصبح شلال وليس دموع فقط .. 
- محمد .. محمد شوف فيا هز راسك !! 
- ( عينيه ولاو حمرين لحيتو فزكات بالدموع ) .. اممم 
- ماغانقدرش نحس بيك مهماا شرحتي ليا ، أنت بطل بطل يا محمد عرفتي علاش ؟؟ لأنك لحد الآن واقف و مواجه الحياة بحلوها و مرها ولو داكشي لي داز عليك ، و الحاجة الأكبر أنك لقيتي طريقك و أنك سلكتي طريق النور و الحق أنت أقوى يا محمد أقوى بزااف و بمن ؟ بالله تعالى ^^ ، على الأقل أنت عارف أصلك عارف والديك عشتي معهم لحظات و ذكريات ، أما أنا ( هبطت راسي و تنهدت بعمق ) نقول لا أصل .. مجهول ماعارفاش شكون أنا ( رفعت راسي بابتسامة ) ولكن عرفتي شنو أنا ثايقة في الله و هذه ماهي إلا ابتلاءات من رب الوجود همم يعني علينا بالصبر الصبر و أكييد كون واثق أن مازال أمامك طريق زااهر مخضر أكيد ربي مخبي ليك شي حاجة زوينة بزااف لا توصف أبشر يا محمد أبشر 
- ( مسح دموعو بابتسامة قدرت نفهم أنها ابتسامة ارتياح وامتنان ) دوزت ماضي سيء بمعنى الكلمة كنت تانتلذذ بظلم الناس و أذيتهم ، ماكانش فالباطن ديالي ذرة أخلاق حميدة أو رحمة أبدا كنت شخص سيء حقاا الكل كان كيكرهني إلا أصدقاء السوء طبعا هوما معك فكل سيئة و منبوذة .. حتا دخلتي لحياتي ! كان من طبعي أن كل مسلم كيجي فطريقي كانآذيه سواء جسديا أم نفسيا ...

- تبعت دراستي و كنت مجد فيها ، كانت حبل الأمل الوحيد لي فحياتي ، تبعت تخصص الإقتصاد المقاولات و تسيير الشركات خديت ديبلوم بامتياز !! فنفس الوقت جاك و جاكسون كانو الصديقين الوحيدين لي فحياتي .. مانسيتش موت بابا أبدا او الطريقة باش مات ، الحقد عما بصيرتي و وسخ قلبي .. التحقت بالمخابرات الألمانية فنفس المسار ديال بابا الله يرحمو ، بحكم أنه كان عميل جد ممتاز فملقيتش مشكل .. كنت كانقرا و فنفس الوقت كانسطاجي و كانتدرب و كانقرا فالمجال الإستخباراتي .. كان عندي هدف واحد لي هو الإنتقام نهار على نهار كانحقد على الصهاينة .. الكره كيتفاقم مني كانشوف معانات الفلسطينيين و حقارة الإسرائيلية .. تربا فالداخل ديالي وحش آدمي ضد الصهاينة و إسرائيل ؛ من بعد ماخديت دبلومي لي جاك و جاكسون تاهوما تخرجو فنفس العام ، ربطنا شراكة و أنشئنا الشركة DYT في فرنسا لي لقات نجاح كبير .. كانت شي حاجة غريبة كاتطرا بين جاك و جاكسون و ميري !! كانو كيغيبو فجأة و يبانو فجأة ؛ كان عندهم مستوى من الغموض كبير بزااف ؛ هنا بدات الأبحاث ديالي بما أن ألمانيا على عداوة كبيرة بإسرائيل كنا متبعين الصغيرة و الكبيرة عليهم لذا مالقيتش شي صعوبة باش نعرف أنهم ضباط فالموساد ! زاد الحقد عما عيني و كرهتهم من أعماق أعماق قلبي .. هنا بديت كانخطط و نخيط على شي خطة باش نقدر ندخل للموساد ،، بما أني عميل سري تا حد ماكان عارفني ! ...

_ ماكانش اعتراض من المخابرات الألمانية عكسا تمااما لأننا غانحققو نجاح للبلاد وليا أنا أيضا شخصيا ، ولو كانت نسبة الخطر جد مرتفعة إلا أني مصر أن آخذ ثأر أبي بيدي ! ماهتميتش لحياتي أبدا بل شرف ليا .. الموساد صعيب بزاف تدخل لها الا اذا كنتي ثقة و هادشي لي وقع لي مع جاك و جاكسون تقربت منهم لأقصى حد و بعد جهد كبيير انضميت للموساد ، آش غانقولك جو مقرف مقزز أسوء أيامي هي مني كنت فيه أو مني كانشتاغل معهم .. فداك العام لي انضميت لهم لقات إسرائيل خسارات بزااف من ناحية الأمن و الجانب الإستخبراتي وهادشي بفضلي ! لكن مافكروش حتا يشكو فيا بسبب الخبرة و الكفاءة لي عندي فهاد المجال .. حتا يجي النهار لي غانتبدل تغيير جذري ، نهار بنتي فحياتي .. أول ماجيتي دوزي l' entretien شي حاجز منعني أنني نطردك او نآذيك بل وصل هاذ الشعور أني نخدمك و نقبل ملفك معانا فالشركة ماعرفتش كيفاش وعلاش ؟ ولكن شعور غريب ، رسالة ربانية لي كانت أول نقطة تحول بالنسبة ليا .. آدابك المستوى الأخلاقي ديالي هدوئك و إحترامك لجميع الأطر جذبني باش نعرف هاد الدين العظيم لي كيحتم عليكم تكونو هكذا !! بما أني كنت مسيحي متعصب إلا أني عمرني لقيت راحتي فالمسيحية فالغموض و التعقد لي فيها ، بديت البحث ديالي على الإسلام ساعدني كذلك إمام مسجد هناك في فرنسا ،، وعلمت أن دين الله هو الإسلام الذي فطر عليه البشرية ، نبينا محمد صلوات الله عليه انبهرت بعظمتو بأمانتو صدقو شهامتو أخلاقو نقوول أنه أعظم رجل شهدته البشرية صل الله عليه و آله و سلم ^^ ( رفع يديه بزوج بابتسامة هاد المرة نابعة من القلب صادقة ) الحمد لله الذي هداني لهذا ..
_ محمد صدقا عجز لساني عن النطق أنت بطل بطل بطل بارك الله فيك 
_ آميين اختي حفصة ،، المهم غانمشي نتوضئ قرب المغرب 
_ تا أنا إن شاء الله 
( دار عطاني بالظهر و تم خارج ) تفكرت ديك الهضرة لي قال لي قبل مانطلعو للهيليكوبتر 
_ محمد تسنا بغيت نسولك 
_ ( عاطيني بالظهر ) امم تفضلي 
_شنو المضمون ديال ديك الهضرة لي كنتي قلتي ليا قبل ماتطلع للهيلي 
_( بعد صمت طويل كأنه تصدم ولسانو تعقد دار غير راسو نص وجهو ) آا .. صراحة .. أنا أنا ارتاحي دابا من بعد و نهضرو بإذن الله 
يالاه باغا نتكلم و خرج و خلاني فحيرة تاامة !! ...

بعد الصلاة توجهت للسرير حاسة بتعب شديبد و صحتي كولها مهلوكة ! طليت فالمري حالتي حالة الأثر د الكدمات فوجهي زرق .. عيوني أحاط بهم السواد ؛ ضعافيت بزااف ؛ تفقدت جسمي و إذا بأثر الحرق و الضرب !! يا أسفاه تجاهلت الأمر و توجهت للسرير .. غفوت بسرعة كبيرة كأنني ما ناعساش لمدة طويلة .. قبل النوم وضعت منبه لصلاة الفجر كما عطاني محمد الوقت بالضبط ،، و للفجر حلاوة لا تدركها قلوب الغافلين ..
فقت على زقزقة العصافير ، أشعة الشمس الساطعة الدافئة تسللت لتداعب بشرة وجهي الشاحبة ! نعست كل هاذ الساعات لهاذ الدرجة .. كانتكسل على خاطري مع إصدار أصوات عجيبة هه ،، حتا كانلقا محمد حابس الضحكة و حداه نقولو توأم ربما ؟؟ ولكن كبييرة فالعمر !!
سيدة فالخمسينات تقريبا نفس ملامح محمد نفس زروقية العينين و نفس الزعورية ، شقت ملامحها تجاعد لتعلن بداية الشيخوخة.. مبتسمة ابتسامة حنان و حب .. نقلت النظرات المتسائلة ديالي لمحمد
_ حفصة كانقدم ليك ماما جوليا ^^ ( وجه الكلام لماماه ) ماما هاذي حفصة لي قلت ليك 
_ هاي حفصة لاباس عليك ( الحمد لله كاتكلم بالإنجليزية ) 
_ الحمد لله مدام و أنت كيف أخبارك 
_( قربات و جلسات جنب السرير شدات يدي و بقات كاتأمل فوجهي ببراءة كأنها كاتقلب على شي حاجة فيه ) بخيير ، زوينة كما وصفك محمد ^^ 
_( هبطت راسي بخجل ) شكراا مدام 
_عاودلي محمد على كولشي طرا ليك لذلك قررنا أنك غاتجلسي معنا طول المدة لي غاتكون خطر عليك حتا يتحلو المشاكل و تهدئ الأوضاع 
_ آا .. ( شفت فمحمد و رجعت شفت فجوليا ) أمم مابغيتش نثقل عليكم و انتم كعائلة غاتبغيو تاخذو راحتكم و مايزعجكم او ينرفزكم شي غريب 
_ وشكون قالك انت غريبة على مرات و.. 
بغات تكمل وقاطعها محمد بسرعة و بارتباك 
_ ماما من الأفضل نأجلو الموضوع تا لمن بعد ، ( رجع شاف فيا ) حفصة بدون نقاش ماغاتمشي فين إلا معانا و الدار راها دارك و حنا عائلتك 
_ ( تفكرت ماما حكيمة و الخالة سندس و با المعطي جلال و حسناء أكييد غايكونو مخلوعين عليا على هاد الغياب المفاجئ ) الناس لي دارو فيا معروف أو بالأحرى عائلتي غايكونو مخلوعين عليا بزااف 
_ بنتي حفصة هاحنا غانمشيو للدار و عيطي عليهم و طمأنيهم عليك صافي ^^
_ اليوم غاتخرجي اختي حفصة لذلك فالعشية خبارك تكون عندهم بإذن الله بلا ماتشوشي ... يتبععع

ها أنا أحملها بيدي هاتين ! ماعرفتش واش نفرح ولا نحزن ماعرفتش واش نيكي ولا نضحك ؟ نعتبرها ذكرى أليمة ولا زوينة !! سلسلة عنق نقرية على شكل قلب اليمين منقوش عليه حرف S و اليسار J ماعرفتش آش كيعني بالضبط .. كل ما أعرفه أن ماما حكيمة قالت لي بلي كانت فعنقي مني جابوني للميتم ،، عمرني فرطت فيها أو حيدتها من عنقي.. الذكرى الوحيدة من والدي لي حد الآن ماعارفاش الظروف لي بسبابها تخلاو عليا و سمحو فيا .. نكذب إذا قلت بلي كرهتهم لا أبدا هذاك شعور عابر فقط .. فيقني الطرق في الباب ربما محمد .. لبست السلسلة و خماري و تقاشري و أذنت له بالدخول 
_ حفصة واجدة ؟؟ 
_ ( نضت متوجهة ناحية الباب بالعكاز مسندة عليه ) هاني واجدة فين خالتي جوليا 
_ هاهي كاتسناك فالإستقبال 
توجهنا خارجين سابقني و أنا تابعاه من الوراء بحكم أنني كانتعطل فالمشية بسبب رجلي المصابة ،، استقبلاتني خالتي جوليا بعناق حار و حنان و حب فكراتني فماما حكيمة .. من خلال السلسلة لي معلقة فعنقها عرفت أنها مسيحية شعار الصليب .. أمام باب المشفى كانت واحد الرونج روفر *-* بيضاء وااو حمقاتني .. كملت طريقي في حين أن محمد و جوليا بقاو واقفين !!
_ خالتي محمد واش ماغانمشيوش ياك ماكاين شي مشكل ؟؟ 
_ لاا أبنتي انت لي فين غاديا ها السيارة ( أشارت للرونج ) 
_ اختي حفصة ياك لاباس ؟؟ مالكي سهيتي 
_ آاا .. لا لا والو غي تفكرت شي حاجة و صاف ( الصراحة تصدمت من السيارة باينة لاباس عليهم ) ...

في شوارع برلين المشجرة ، عاصمة السياسة الألمانية ؛ شوارع هادئة تنبض بالحياة ، الأمان و الإطمئنان حركة السير في انتظام وتناغم مبهر ! محلات تجارية و مطاعم ضخمة .. روعة بكل معنى تحمله الكلمةة ؛ مرورا ب بوابة براندنبورغ من أبرز المعالم التاريخية التي شهدتها ألمانيا ؛ ها أنا ذي أستمتع بالمناظر الخلابة الجذابة ! متكية على زاج السيارة الخلفي .. محمد و الخالة جوليا في الأمام .. ليوقف محمد السيارة فحي هادئ جداا عكس السابق بكثير .. اتجهنا نحو عمارة ضخمة بكل المقاييس ،، أنا غي حالة فمي فعلاا تبهرت ! كانت الشقة فالطابق الثاني لذا ماحتاجيناش الآسانسور
تقدمنا محمد في حين أنا طالعة بشوية عليا مستعينة بالخالة جوليا .. 
لأجد نفسي تائهة فأكبر شقة رأتها عيني لحد الساعة واو رووعة ما شاء الله .. أفرشة عصرية أنيقة ، ديزاين و أكسسوارات ملفتة و راقية .. أرضية خشبية لامعة ! 
_ بنتي حفصة ( خرج الإسم بتعلثم و صعوبة بما أنه إسم عربي ) مرحبا بيك فدارك 
_ شكرا خالتي هذا من طيبتك نتمنى نكون خفيفة عليكم 
_ ماتقوليش هكذا ابنتي راكي فمقام محمد ،، آجي معايا نوريك الغرفة ديالك 
_( تحركت تابعة خالتي ثم رجعت التفتت لمحمد لي حصلتو متبعني بعينيه سرعان ما هبطهم ) محمد شكرا بزااف اخي عمرني نسا لك هاذ الجميل جزاك الله 
_( بابتسامة ) هذا واجبي بما أني لي ورطتك فالمشكل العويص و حنا إخوة صح ^^ 
يالاه بغيت ندوي رفع يديه بمعنى تفضلي مع ماما 
_ حفصة ما نبغي نسمع منك والو حاليا خاصك الراحة لذا تفضلي مع ماما لغرفتك و مرحبا بك مرة أخرى فداركم 
اكتفيت بابتسامة شكر ، وتحركت تابعة الخالة جوليا .. فهاذ اللحظة سمعت طقطقات حذاء ماشي ديال الخالة جوليا ولا حتى ديال محمد ، من إذا ؟؟ وما هي إلا ثواني معدودة ظهرت امرأة مسنة لكن بصحيحتها ما شاء الله بينها و بين الهالة جوليا شبه !! 
_ بنتي حفصة كانقدم لك الأم ديالي أنجيلا حاليا قاطنة معنا أنا و محمد ^^ 
_ سلام عليكم خالة أنجيلا ( بابتسامة ) 
_ أهلا ببنتي حفصة تكلم عليك محمد بزاف ^^ ( جات عنقاتني بادلتها العناق باليد الأخرى لي ماشاداش بيها العكاز ) حفظك الرب بنيتي مرحبا بك معنا 
_ من طيبتك و روحك الطاهرة خالتي 
... يتبع

غرفة كبرى أو بالأحرى نقولو جناح ، الطلاء المزركش بألوان الحياة ألوان زاهية تقذف في قلبك السرور .. نافذة من أكبر ما رأت عيني تطل على الشوارع البرلينية ؛ منظر ساحر تزامن مع غروب الشمس يا سبحان الله .. بعد الراحة و الصلاة سمعت طرق خفيف على الباب ثم تفتح كانت الخالة أنجيلا ^^ 
_ ابنتي حفصة من البديهي يكون فيك الجوع لذا تعالي هاحنا كانتسناوك على المائدة لا تتأخري يا بنية 
_ حاضر خالتي جاية في الحال 
لبست خماري جواربي هزيت عكازي و خرجت كان كولوار طويل على طولو غرف كثيرة ! 
كانت الخالة أنجيلا و جوليا و محمد منسجمين فجو عائلي على مائدة الطعام بها ما لذ وطاب من الأطعمة ؛ لمحتني الخالة جوليا ' 
_ بنتي حفصة تفضلي عزيزتي 
خديت طريقي لأحد المقاعد بجنب الخالة جوليا كان مقابل لأنجيلا و محمد .. جلست و بدأت أتفحص الطعام بعيني ماكانتش شي حاجة مشبوهة من نبيذ أو خمر ، هذا طبيعي فمحمد ماغايجلسش بمائدة بها محرمات .. رفعت عيني تجاه محمد بنظرة تساؤل و حيرة ! سرعان ما فهم نظرتي 
_ أختي حفصة تفضلي الطعام خالي من لحوم الخنازير أو الكحول 
_ ماتخافيش آبنتي فحنا من عائلة و أصول مسيحية متدينة لذا فمكانتناولوش لحوم الخنزير أو منتوجاته أولا يا جوليا 
_ صح يا ماما حنا آبنتي حفصة مجتنبينو حتى لأضراره الصحية الكارثية 
_ صراحة كانحييكم بحرارة بما أنكم مسيحيين و مالقيتوش أدنى حرج من إسلام محمد
_ ماعندناش مشكل فاختلاف الأديان ، متفتحين و كانحتارمو رأي و مسلك كل فرد من أفرادنا وولدي محمد مني لقا طريقو و راحتو في الإسلام ماغانضايقوهش أبدا 
_ صح مالقيتش آ اختي حفصة شي إشكال من أمي أو جدتي تقدري تقولي هما عائلتي الصغيرة باقي الأفراد قطعو صلتنا من زمان و فقدنا التواصل معهم ،، نتمنى بإذن الله نفرح بإسلام أمي و جدتي عما قرييب لما لا إن شاء الله ... يتبع

في يدي المرتعشتين أحمل سماعة الهاتف الثابت ، خايفة من ردة فعل حسناء هي الوحيدة لي حافظة رقم هاتفها ، كيصوني و بعد مدة وجيزة تقل عن الدقيقة ..
_ ألو السلام عليكم 
_ عليكم السلام و رحمة الله حسناء 
صمت رهيب !! ظنيت أنه انقطع الخط .. فجأة صوت شهيق البكاء
_ ( بالبكاء ) ماشي حشوومة عليك خليتينا كي الحماق ماعرفناك حية ولا ميتة واكلة ولا شاربة شنو درنا ليك بالله عليك 
_ ( بعد تنهيدة طويلة ) حسناء عافاك ماتبكيش دموعك غاليين ، واش أنا لخاطري كون تشوفي شنو داز عليا 
_ ( بالغوات ) فينك انت دابا نجي عندك دوي 
_ حسناء تهدني عافاك أنا حاليا فألمانيا 
_ ( مصدومة ) ششش شنو شكاديري فألمانيا كيدرتي مشيتي وانت خليتي وراقك هنا 
_ مادازش عليا القليل و أنا كرهت ،، فين شفتي وراقي ؟؟ 
_ مني غبرتي تشقات الأرض و بلعاتك أول حاجة درتها قبل مانديكلاري خديت الدوبل سوارت ديال الشقة من عند الكونسييرج .. لقيت حوايجك كلهم تماك وراقك أغراضك تا حاجة ماناقصة .. مافهمتش سبب غبورك ! تخلعت بلا قياس ماخلينا فين قلبنا الخالة سندس ديما كاتسول فيك وسبب غيابك عليها فالإتصال ؟ مابغيتش نخلعها لذا كل مرة كانختالق عذر كنت غانحماق أنا و جلال بالتقلاب فرنسا كولها قلبناها وما ليك أثر !! شنو سبب غيابك وعلاش حتا لدابا عاد بنتي ؟؟ 
عاودت لها كولشي من التفاصيل الكبرى إلى الأدق .. ماحسيتش تا هبطو ليا دموعي ! بكيت و فرغت قلبي لأنه بالكاد سينفجر .. 
_ ( بكاء حار ! حسناء قلبها طيب لأقصى درجة قلبها صافي ينبض بالخير و الحب ) ياا الله يا مولاي إهئ يا حفصة و ماداز علييك و حنا ماسايقين خبر و مقلوبة علينا القفة سمحيليا ظلمتك ظلمتك 
_ حسناء ماتقوليش هكاك كل دقيقة و ثانية انتم فبالي ، الله يجعلها ليا مغفرة للذنوب 
كملت الكلام مع حسناء وصيتها تبلغ سلامي لجلال وتطمأن الخالة سندس و السي المعطي و ماما حكيمة ..
رجعت الهاتف للمكان ديالو ارتاحيت جدا بعد الإطمئنان على عائلتي ^^ ، جذبني المنظر الساحر في النافذة ! أنيرت شوارع برلين المبهرة لتعطي لوحة فنية فاقت الجمال ، رفعت راسي للسماء و إذا بالقمر و نوره الساطع سبحان الخالق .. سديت النافذة تحرك البرد و توجهت عند الخالتين و محمد لي كانو فالصالون ..
فالطريق جذبني واحد التمثال ! قربت أكثر كانت شابة تحمل طفلا رضيعا و بجنبها رجل أطول منها و محوطها بيديه ، فايت لي شايفة هاد التمثال ولكن ماعرفتش شنو كيعني ؛ بقيت مدة ساهية فيه .. تا سمعت صوت ورائي كانت الخالة جوليا المتكلمة 
_ عرفتي آ حفصة شكون الأشخاص لي فهاد الثمتال ؟؟ 
_ لا ؟ ولكن فايت لي شايفاه شحال من مرة في فرنسا 
_ ( تلمساتو بيديها ) مريم العذراء يسوع و الله 
_( ظني فمحلو ) أممم إذا عقيدتكم كما هي مبنية على التثليث ؟؟ ولكن ماجاكمش الأمر غير منطقي عقليا ؟؟ ( ضرت شفت فيها ) 
_ كانظن الأمر طبيعي ولو كاين شوية ديال الغموض 
... يتبع

غانوقفو بالضبط فنقطة الغموض ! ( رجعت شفت فالتمثال ) باش كاتآمني يا خالة ؟ فالمسيحيين طوائف كثيرة و عقائد مختلفة و كل طائفة شادة منحى مختلف 
_ الكاثوليك إنجيل يوحنا 
_ أممم طيب ! أليس بالغريب أنك تقولو للرسول عيسى عليه السلام أنه إله و إبن الله ؟ خلق فكيف سيخلق ؟؟ 
_ وأين الغريب فالأمر !! علاش لي مايكونش إبن الله و هو تزاد بدون أي تدخل أبوي ؟ 
_ نحن كلنا أبناء الله بمعنى خلقنا ولكن لاا يمكن أن نقول أننا مولودون من الله أعووذ بالله !! حسناا ممكن تعطيني شي دليل فالإنجيل يقول فيه يسوع عليه السلام أنه ابن الله ؟ 
_ آام ( بارتباك ) لا ماكاينش ولكن ..
_ ولكن آاش طيب ممكن تعطيني شي دليل آخر فالإنجيل ذكر فيه الثالوث ؟ طبعا ماكاينش !! إذا ؟؟
_ أممم واخا ممكن تقولي لي علاش فسورة آل عمران الآية 50 من القرآن فيها أننا خاصنا نتبعو تعاليم المسيح ؟؟ 
_ ( بابتسامة ) ، نقولك أن المسلمين متبعين تعاليم المسيح بدون مسيحية وكفر و هناك عدة آيات تنص على الإيمان بعيسى عليه السلام و أنه من أعظم رسل الله! بل ركن من أركان الإسلام الإيمان بعيسى و رسالته و الإنجيل لي تحرف و كل إنجيل مختلف على الآخر و هذا بحد ذاتو شيء غير منطقي عكس القرآن .. 
_ ( بعد صمت طويل ) واخا ممكن تقولي لي لو أن الإسلام هو دين الحق ولي يلزم على البشرية كاملة اتباعه و الدخول فيه علاش لي ما أرسلش الله محمد من الأول ؟ و علاش الإسلام جاء متأخر ؟؟ 
_ طيب سؤال جد جيد .. الإسلام دين الله منذ أول رجل في العالم آدم عليه السلام .. فإبراهيم موسى إسرائيل عيسى كلهم كانو مسلمين .. طيب ممكن تخبريني مثلا أن محمد لما كان صغير و كان طموحو يقرا الطب ، جاء و قال ليك أمي حطيني مباشرة فكلية الطب واش ممكن ؟؟ 
_ أكيد لا 
_ علاش ؟
_ أول مرحلة الروضة ثم الإبتدائي المتوسط ثم الثانوي عاد كلية الطب آخر مرحلة ..
_ جيد جداا هذا هو المقصود من الله تعالى على البشرية ،، الإسلام بالمراحل شوية بشوية ! مثلا موسى عليه السلام الذي جاء بالتوراة ثم ورائه عيسى ثم محمد صل الله عليه و سلم آخر رسول و متمم الدين الحق دين الله 
_ ( صمت طوييل كأن هضرتي حركات فيها شي حاجة .. يالاه بغات تهضر تا قاطعنا محمد بالمجيء ديالو ) 
... يتبع

تمر الأيام مسرعة أكثر مما ينبغي ! باقا كانتذكر مزيان داك اليوم ماعرفتش كيفاش نسميه ، مشؤوم أو سار ! حياتي تقلبات رأسا عن عقب لتتخذ منحى جديد مرة أخرى .. ها أنا ذي فشقتي القديمة بفرنسا .. مازال داخلة فصدمة من داكشي لي وقع مؤخرا ماستوعبتش الأمر 
قبل * شهر * : 
مرت أيام و أيام ^^ ،، الخالة جوليا و أنجيلا بداو كيقتانعو بالإسلام ولله الحمد أسلمو بفضل الله .. دوزت أحلى أيام بألمانيا ؛ رجلي بدات تتماثل للشفاء .. فهاد المدة البسيطة دخلت كانتعلم اللغة الألمانيا على الأقل نقدر نتواصل مع الناس هنا !! 
أشرق يوم جديد مشمس دافئ يحمل في طياته أحداثا جديدة لست بأدرى كيف ستكون ؟ .. اليوم بالذات مختلف ؛ أخبرتني الخالة جوليا أن زوجة عم محمد غاتزورنا و غادوز شي أيام هنا في برلين بحكم أنها قاطنة في ميونخ .. خملو الدار بما فيها في حين ماخلاونيش نعاونهم بحكم رجلي مصابة 
_ الخالة جوليا مايمكنش نخليكم هاكذا بوحدكم واخا غي نمسح الغبرة !!
_ ( شدات لي وجهي بين يديها ) بنتي حفصة دغيا دغيا غانساليو كيف كاتشوفي ماكايناش شي خدمة بزاف غي شي حاجة طفيفة صافي .. الأهم عندنا تعطي لرجلك الراحة ماتفورصيش عليها اوك كتكوتي 
_ ولكن .. ( قاطعاتني ) 
_ حفصة ماكاين ما والكن ماتعارضينيش 
_ صافي بقيتها خليوني نوجد لكم أكلات مغربية الطبخ ماغايضرش برجلي 
_ ( هزات حاجب ونزلات حاجب ) اممم
_ عافااك خالتي ماغانضغطش علر رجلي غانطبخ غي بالمهل ماتخافيش راني وليت بخير الحمد لله 
ماتسنيتهاش ترد عليا و توجهت للمطبخ ، بقيت كانفكر شنو مممن نطبخ لهم خصوصا الخالة حوراء ( اسم زوجة عم محمد ) قادمة فالغذاء .. بما أنهم ماكيبغيوش يتقلو بمعنى ياكلو شي حاجة صحية و خفيفة قررت ندير لهم دنجال مشرمل في الفران ؛ التكتوكة و سلطات أخرى .. بديت فالتوجاد حسيت بواحد السعادة بحكم أن الطبخ من هواياتي المفضلة و فنفس الوقت قلبي مقبوض و مامرتاحاش نهائيا !! شعور أخافني ولكن حاولت تجاهله و عدم إعطائه قيمة طنا مني أنه تلبيس إبليس و كيده .. إستعذت بالله و أشغلت نفسي بالإستغفار .. يتبع

صوت غريب عليا أول مرة نسمعو ، اخترق مسامعي و أسرى على باقي أعضائي قشعريرة و رعشة عجيب !! صوت رن في قلبي و أحيا إحساس لم أشعر به يوما قط .. فجأة تقلص قلبي و نغزات كالسكين كدت أسقط .. حطيت ما فيدي و سندت على الجدار أتنفس بسرعة قلبي كيضرب أكثر من المعتاد .. شهيق زفير لعله يعود لوضعه الطبيعي و لعل صدري يتنفس شوية !! .. بدأت بتلاوة آيات من الذكر الحكيم ارتحت نسبيا ؛ ماعرفتش هادشي مناش يمكن من كثرة الضغوط النفسية فالمدة الحالية .. بقيت على هاذ الوضع وسط أمواج من الأفكار تاديني و تجيبني سمعت طقطقات حذاء يقترب قاديت وضعي بسرعة ورسمت ابتسامة مصطنعة لعله مايعيقش بيا .. كانت الخالة أنجيلا بحلتها الأنيقة و نظراتها البريئة 
_ بنيتي حفصة الضيفة جات ممكن تفضلي معايا يا عزيزتي 
_ ( توجهت نحوها بنفس الإبتسامة كانعرج شوية مشيتي مازال ماتقادات ولكن حيدت العكاز ) حاضر خالتي 
في الصالون جالسة المدام حوراء عاطياني بالظهر و كانت محتجبة ، كما أخبرني محمد أنها أول وحدة دخلت للعائلة مسلمة ..
_ حوراء 
_ ( التفتت بابتسامة سرعان ماجمعتها مني شافتني وجهها ولا أصفر ) اآ ام نعم ( سهات فيا ) 
_ ( ابتسمت ليها ) السلام عليكم يا خالة كيف حالك 
_ عليكم السلام و رحمة الله حمدا لله بنيتي لا شك أنك انت حفصة صح ؟؟ 
.. يتبع

حسيت بنظراتها تخترقني ، كأنها كاتقلب على شيء فوجهي ! لونها أصبح شاحبا ! حاولت نتفادى نظراتها أربكوني جالسة على أعصابي .. حسيت بشيء غريب جدا شنو هو الله أعلم ؛ بقيت جالسة شوية من بعد استأذنت طلعت لبيتي ، نفس الإحساس الوساوس لا تكاد تفارقني ،، هذا اليوم الثاني ليها هنا .. كانحاول قدر الإمكان أني نتفاداها و نتفادى الاحتكاك معاها ولكن نفس الوقت حاولت نصد أي تصرف يقدر يشككها فيا ..
هابطة مع الدروج و شاداني البكية لحد الآن ماعارفاش راسي من رجليا شنو واقع ليا !!
توجهت للصالون طلبا من محمد نجلس معهم شوية .. بحكم أن محمد هاذ الأيام قليل فاش كانشوفو بسبب خدمتو الإستخباراتية ؛ المشكل د القاعدة الجوية الإسرائيلية تحل و رجعات المياه لمجاريها .. ميري و جاك لا خبر عليهم لحد الساعة 
اتخذت مكاني فالكنبة بجنب الخالة جوليا ؛ مدات ليا فنجان قهوة .. فجأة بدون سابق إنذار كانحس بسلسة ديالي تحلات و طاحت أرضا .. مديت يدي نهزها حتا سبقاتي أحد الأيادي !! هزيت عيني كانت الخالة حوراء هازاها و كاتأمل فيها .. ناضت بطريقة هستيرية عينيها امتلؤو بالدموع .. شافت فيا

م مم .. ماياا ( نزلو دموعها ) 
مافهمتش آش تاتقصد و شكون مايا !! شفت فالخالتين جوليا و إنجيلا و محمد هوما الآخرين في نظراتهم و وجوههم علامة الحيرة و الدهشة .. 
مانطقت بحتا شي كلمة تربط لساني !! توجهات عندي شداتني فالذرعان ديالي و كاتديني و تجيبني
_ هضرييي شكون انت و فين جاتك هاذ السلسلة 
_ ( بخوف و ترقب ) الالة السلسلة يمكن تشابهات لك مع شي وحدة أخرى ماشي هي الوحيدة لي كاينة فالعالم و من الفوق أنا من المغرب 
_ ( طاحت على ركابيها ) لاا مايمكنش هاد السلسة تصنعات خصيصا لبنت ختي .. فين جاتك دوي ( انهارت بالبكاء ) 
_ ( طاح لي الماء فالركابي لساني ثقال عليا احساس جد فظيع ) لا مستحيل ( نطرت لها السلسة من يديها ) السلسلة ديالي و ممكن تقولي هي الذكرى الوحيدة من واليديا لي رماوني فالميتم فالمغري بالضبط فمدينة الرباط 
ماقدرتش نتحمل هبطو دموعي و اتجهت نحو الغرفة ديالي حتا توقفني هضرتها لأصدم من جديد 
_ انت هي مايا اهئ مايا بنت اختي إهئ الله ياخد فيه الحق لي رماك فالميتم الله ياخذ فيه الحق 
_ شش شنو كاتقولي مستحييل مستحيل ( هبطو دموعي ) 
_ إهئ لاا حتى حاجة مامستحيلة انت انت من أم ألمانية و أب مغربي انت ماياا 
نزلات عليا الصاعقة زلزلاتني ، تربط لساني لأعجز عن النطق .. يكفي صدمات يكفي 
_ أنا حفصة ماشي مايا أنا ما بنت احد أنا مقطوعة من الشجرة ما عندي لا أب لا أم و من الفوق باش عرفتيها هه راه ماشي أنا بوحدي لي كاين.. ( قاطعاتني ) 
_ ( توجهات عندي ) ماشي انت بوحدك لي كاينة ولكن كولشي كيدل على أنك بنت سيلفيا اختي لي حاليا مرمية فمشفى الأمراض العقلية من نهار خطفوك من نهار خداك بالقوة المجرم الله ياخد فيه الحق .. كاتشبهي ليه بزاف نسخة طبق الأصل من الأب ديالك لكن لا شبه بينكم فالاخلاق و الشخصية لا أبداا .. يتبع

مابقاش عندي النفس لي نطلع ، ضاقت عليا الأرض بما رحبت ، آاه يا ليت الطفولة تعود يوما ! فقلبي لا يتحمل أعباء الدنيا .. 
_ ( كانضحك بهستيرية و فنف الوقت بكاء ) لا لا أنت لاعبة معايا ياك هههه لا مايمكن ( توجهت لعند الخالة جوليا ) خالتي دوي هضري قولي ليها غي كاتكذب قولي ليها بلي أنا مقطوعة من الشجرة قولي ليها ماعنديش أبوين ( رجعت للوراء و كانشوف واحد بواحد ) إهئ هضروو دويو مالكم سكتو إهئ إهئ 
طحت على ركابيا فشلت اختل توازني .. ظل قرب مني و نزل على رجليه كانت هي حواراء ! هزيت عيناي الممتلئتين بالدموع ، نظرة حزن ألم حسرة شعور لا يوصف ، انتشلت أشلائي بين حطام وركام الألم عجزت عن النجاة .. يا الله 
رفعات يديها محاولة مسح دموعي لكن ! سرعان ما وقفت على رجلي اتجهت نحو الغرفة ناطقة 
_ بغيت نبقا بوحدي جزاكم الله خيرا يكفي يكفي مابقيتش قادرة 
_ بنتي مايا ماتقتليناش هكذا ( بالبكاء ) إهئ آه لو تعرفي مناش دزنا في رحلة البحث عنك .. ماتقطعيش حبل آمالنا مادمريناش !! 
** حاليا ** 
كلمات تتردد على مسامعي في كل حين و مكان .. ( تنهدت بعمق شديد محاولة مني نحيد ولو القليل من الثقل ) .. رجعت لفرنسا بعد جهد مني و محاولات كادت تبوء بالفشل !! رجعت خليت كولشي ورائي الأم ديالي هه مصطلح جديد عليا عمرني عرفت مذاقو و حلاوتو كيف هي ؟؟ .. ماشفتهاش بغيت نبعد على كولشي ! يكفي لي قاسيت يكفي لي دوزت ، شباب بعقول خمسينية هكذا أنا !! .. إلى متى الهروب ؟ 
توجهت مباشرة خديت هاتفي أجريت إتصال لألمانيا ،، يرن و كان المجيب 
_ السلام عليكم و رحمة الله ؟
_ عليكم السلام و رحمة الله الخالة هند ( أنجيلا قبل الإسلام الآن غيرات إسمها ) 
_ ( صمت ثم تنهيدة ) ياا بنتي حفصة فينك و فين غبرتي علينا ،، حشومة عليك و مادرتي فينا 
_ خالتي عذروني والله ما لخاطري و الله إني لكنتقطع مئة مرة فاليوم تأزمت نفسيا بغيت نبعد على كولشي نفسي أيضاا !!
_ آه يا بنتي وهل من سبيل للهروب من الواقع و الحقيقة لو كان كذلك لاختفى الكل من زمان صبرا يا بنيتي صبرا فالله معك 
_ ونعم بالله العظيم .. صراحة أمم أنا المهم ان شاء الله الأسبوع القادم غانكون تماك بغيت نحل الأمور المعقدة بغيت الحقيقة ..

• غرّد
• شارك
• شارك
• شارك
• شارك