قصة للصبر حدود الجزء الاول

يوم كباقي الأيام ' أول ماكانحل عيني !! على الاهانة و الشتم و تقدر توصل تا للضرب من طرف زميلاتي فالغرفة لي ماعرفتش شنو سبب هاد الكراهية الكبيرة لي تيكنوها ليا !! لولا لطف الله و تدخل ماما حكيمة ما عرفتش كيف كنت غاتقدر نصبر على هادشي كاملة ،، صاابرة لأني بدون مأوى بدون نسب ماعرفتش شكون أنا كيفاش جيت لهنا ؟ شكون هوما واليديا و أهلي ؟؟ علاش تخلاو عليا..

ماعارفاش الضروف لي بسبابهم تخلاو عليا و رماوني آه رماوني كأني حشرة !! كرهتهم و لمتهم حااولت و حااولت عمرني نوسخ قلبي بالكره و الحقد ولكن ما قديتش ،، هادي هي الحياة سجن المؤمن و جنة الكافر و الحمد لله على كل حال الأمل الوحييد ديالي فهاد

الحياة هو الله نعم الله

الله وحده لي كانستامد منو القوة جل في علاه ،، متمسكة بحبل الأمل و التفاؤل عارفة أن هادي غير البداية و أن هاد الحياة الدنيوية يوم ليك و يوم عليك ،، ماما حكيمة هي المربية ديالنا فالخيرية أو الميتم .. امرأة أقل ما يقال عندها طيبة و حنونة عاطفية جداا دائما هاد المقولة على لسانها : - نتوما وليداتي لي ماعطاهمش ليا الله

ماما حكيمة امرأة في عمر 50 سنة ؛؛ بشوشة الوجه و عطاها ربي نور سبحان الله تقتحم قلبك بدون سابق انذار ' الشيب لي على راسها عاطيها وقار و جمالية خاصة و التجاعيد لي غطات ملامحها الفاتنة السوداء المغربية الأصييلة و كيف كانقولو الا مشا الزين كيبقاو حروفو ؛ ما شاء الله صحيحتها مزيانة و مازاال شادة فراسها اللهم بارك .. متزوجة ولكن مارزقهمش الله الوليدات فيها خيير و الاجمل من هذا رزقها الله زوج صالح صاالح بمعنى الكلمة زوج عطاه الله القناعة و مني عرف أنها عاقر ماتخلاش عليها بالعكس زاد حبو ليها و تمسكو بيها ، رغم معارضات عائلتو طبعا كيف كاتعرفو ..

متمسك بدينو و لله الحمد ضارب الدنيا بركلة و داائما كانتذكر الجملة لي كيقول كلما زارنا : هاد الدنيا ماشي لينا ؛ هادي ماشي بلاصتنا فعلاش نهزو الهم عيش يومك يومك حيت ماعارفش واش غدا غاتكون و لا غاترحل ..

أعجبت بقصتهما و بحبهما القوي لي تعاهدو أنه ماغاينتاهيش أبدا و إنما غايدوم في الجنة ان شاء الله

با العربي هو العساس الليلي ديال الميتم رجل بسيييط و قانع بلي عندو شاف بزااف فالدنيا ملامحو بريئة سبحان الله واخا تقدم فالعمر ،، كل ليلة كانجمع معاه ماكانملش فالهضرة معه شخص حكيم فالعقل ديالو واخا المستوى التعليمي البسيط ديالو ! .. تعلمت منو بزااف و كل نهاار كانتفاجئ بشخصيتو و بالايمان ديالو القوي ^^ ،، كانبقا مجمعة معاه لساعاات طوال و ربما حتى للفجر بحكم أني ماكانقدرش ننعس يعني الارق ؛؛ و كاننعس لساعات قليلة و من وراها كانفيق على الغوات و الصداع و الشتم ووو و هادشي لاش !! صافي عييت من هادشي نضت كانغوت بركان انفجر ؛ بقاو مصدومات حيت ولفو فيا البنت الدرويشة لي حانيا الراسي ديرو فيها ما بغيتو سمعتهم مزياان و خرجت للجردة نتنفس شوية د الهواء تخنقت ،، طاحو زوج دمعات من عيني دموع القهرة الألم الحسرة كوولشي كولشي ،، البنات لي معايا فالشومبر كيكرهوني أشد كره كيحسدوني و كيغيرو مني بزااف وعلاش ؟؟ ماشي حيت انا زوينة او كانلبس مزيان لاا انما حيت تفوقت عليهم بأخلاقي و ارتاقيت بديني و هوما عكس هادشي تمااما و متشابهين أنا الوحييدة لي مختالفة فيهم !

بقيت ساهية و كانفكر و فجأة وقفات عيني على واحد القطيطة كاتلعب مع وليداتها صغيييورين بقيت كانشووف فيها و ابتاسمت لا إراديا ..

تحطات يد على كتفي درت و اذا هي ماما حكيمة ابتاسمات ليا و باستني

حكيمة : شنو لي مفيق حبيبتي بكري هممم

أنا : ( مابغيتش نبين ليها ) والو ماما غي فقت و صافي شبعت نعاس

حكيمة : بلا ماتحاولي تخبي عليا آبنتي عاارفة كولشي ، صبري ان مع العسر يسرا ربي معك

ماقديتش نصبر انفجرت باكية و عنقاتني بأحر ماعندها بقات كاطبطب ليا على ضهري مع تلاوة بعض الايات من الذكر الحكيم حتا استرحت و ارجعات ليا البسمة المزيفة لي طول الوقت كانصطانعها ،،

حفصة سميتي حفصة عمري 17 سنة حاليا و قربت نقفل 18 حياتي روتينية بين الميتم و الدراسة كانقرا فالصف الثانية باكالوريا شعبة الاقتصاد ،، هادي حياتي هكذا كانعيش ماعارفاش راسي ماعارفاش شخصيتي بالنسبة ليا غريبة على راسي و مازال مالقيتو !! أنا بنت عاادية مقبولة الشكل محتجبة الحمد لله حجابا شرعيا الشيء الوحيد لي كيميزني هوما الغمازات لي كيبانو مني كانضحك و للأسف شحال هادي ما بانو ،،

قرب اليوم المشؤوم ليا اليوم لي غانتعرف على العالم و على الحياة الحقيقية !! وصلت لسن الرشد أي خاصني نخرج و نقلب على راسي ، ماعرفتيش فيين و لمن غانحط الراس أنا منبوذة فهاد الدنيا لا حنين لا رحيم سوى الله سبحانه ياا رب عاوني ،،

درت فالميتم بيت بيت مكان تلو الآخر كانستشعر و كانرد الذكريات حلوها و مرها هنا كبرت هنا دوزت طفولتي هادي أمي و أبي و عائلتي

جمعت أغراضي بالبكاء حين أن الزميلات ديالي فرحاانين و ماقاداهم فرحة حيت أخييرا غايتهناو مني !! الله المستعان آش درت لهم باش يكرهوني ..

دخلات عندي ماما حكيمة و تا هي باين فيها البكاء أنا لي كنت مقربة ليها بزااف من دون الفتياة الأخرين كانت بالنسبة لي بحال أمي لي أصلا ماعنديش

حكيمة : بنتي يهديك الله علاش مابغيتيش ديري بكلامي و تجي عندي راني ساكنة غي أنا و سعيد ( زوجها )

أنا : ( قربت لها و شديت يديها بستها ) ماما حكيمة أنا كبرت ياك وقادة براسي ^^ يكفيك لي دوزتي معايا و تعذبتي معايا و اصلاا مابغيتش أبدا نثقل عليك واخا تقولي العكس ولكن الانسان كيبغي يعيش بحريتو و عندو خصوصياتو و من الفوق سي سعيد ماشي من المحارم ديالي يعني لا يجوز ؛؛ تهناي على بنتك حفصة غاتكون مزياان ان شاء الله دعي معاياا و ان شاء الله مرة مرة غانبدا نزورك يا أحلى أم

بقينا كانتعانقو و نتفكرو الذكريات تواادعت مع باقي المربيات لي تاهم ضريفين بزااف و حنانات ^^ توادعت مع المديرة و با العربي طبعا ماسلمش غي بالكلام فقط .. مع الخرجة تلفتت باش نلقي آاخر نظرة ليا فالميتم و دابا شادة الطريق نحو المجهول !! إحساس فضيع تخرج و أنت خاايف و كاتشوف كأنك شي مخلوق غريب ،، بقيت غادة و مرفووعة مانيش فالعالم غادة و ماعارفاش فين غادة تابعة رجليا فين يوصلوني ،، بداو كيهبطو ليا الدموع بلا مانحس تقهرت فهاد اللحظة حتى الفلوس لي نعول عليهم ماهازا معايا الا مبلغ بسيييط ماغايقدنيش تا ليلة وحدة فشي أوطيل بسيط ..

ما رديتش البال تا كانلقا راسي فواحد الجردة كبييرة بانو ليا الكراسة عامرين إلا واحد لي فيه بلاصة خاوية بجنب واحد المرة و راجلها ؛؛ حطيب باليزتي و جلست مااعرفتش اش غاندير فين غانمشي لا حنين لا رحيم ،، انفجرت بالبكاء ماقديتش نصبر و ماقديتش نكتم هادشي فقلبي يكفي يكفي ،، جبداتني شي يد و عنقاتني اييه هاديك المرأة عنقاتني بحنان و كأنها حاسة بيا .. ماحسيتش براسي تا بديت كانعاود لها كوولشي بالتفاصيل المملة ماعرفتش علاش و لكن كنت محتاجة بزااف لحضن دافئ يحسسني بالأمان يحسسني أنه معايا .. قطر عليا ماء سااخن عليت عيني و لقيت أنهم دموعها زادت عنقاتني بحب و حنان أكثر و زدت تخشيت و تكمشت فحضنها بقيت هكاك لمدة دقائق ارتاحييت و تنفس قلبي شوية بعدت منها و مسحت دموعي ابتاسمت ابتسامة شكر

أنا : سمحي ليا آخالتي ماشعرتش براسي صدعتك بهمومي

المرأة : لا أبنتي ماتقوليش هاكذاك بالعكس ،، آاه يا بنتي ماشفتي ماتشافيتي و فقلبك كاع هادشي الله معك الحبيبة ربي كبيير و غايجازيك على صبرك

أنا : ( هزيت عيني للسماء تأملت شوية ) و نعم بالله هو الوااحد لي معايا و حاس بيا ^^

المرأة : الحمد لله آبنتي قلبك صافي ،، و دابا فين ناوية تمشي و أنت ماعندك أحد فهاد الدنيا

أنا : ماعرفتش ماعندي فين نمشي

المرأة ( تلفتات و شافت فزوجها لي كان طول المدة كيسمع لينا و بان عليه التأثر ابتسم ابتسامة مبهومة مامفهوماش ) لا آبنتي عندك فين تمشي نوضي هزي باليزتك غاتمشي معانا و تبقاي تا يحن الله و بلاا ماتعارضي و ماتعطيني تا عذر انت ما شاء الله لابسة الحجاب الشرعي و مختمرة ماتخافيش ماغاديش تختالطي براجلي غاتكوني فبيتك بوحدك مرتاحة صافي ^^

انا مالقيت مانقول الصراحة هاد الناس ارتاحيت لهم و باينة فيهم ناس الله يعمرها دار ،، وافقت ماعرفتش واش لهاد السبب أو هروبا من الشارع و الزنقة لي ماكاترحمش و الذئاب البشرية لكاتسنا أي فرصة بشوق ..

اتجهنا نحو سيارة عادية بسيطة ،، ركبات الخالة سندس و زوجها المعطي القدام و أنا اللور بعدما حطيت باليزتي فالكوفر ،، الطريق كانت طويلة شوية ولكن ماحسيتش بيها حيت طوول المدة أنا و خالتي سندس كانهضرو و كاتعاود ليا عليها و علا ولادها لي هوما بثلاثة بيهم في فرنسا خدامين تماك و بثلاثة بيهم مزوجين ما شاء الله و عندهم و ليداتهم ^^ كيجيو فالعطل .. فجأة لمحت أننا دخلنا في إحدى الأحياء الرااقية حي الرياض لي فالرباط *_* ماخديتش الأمر بمحمل الجدية قلت ممكن يكون طريقهم من هنا ..

وقفات السيارة حدا واحد الباب بشااخ لش غانقول لكن بواابة كبييييرة حديدية بقيت مصدومة '' كلاكسونا سي المعطي و تحلات الأبواء إلكترونيا استقبلنا واحد الشاب لابس رسمي و سلم على الناس و أنا حالة غي فمي مايمكنش واش بصح ولا غي كانحلم ،، لابسين ملابس عااادية جدا و بسييط اضافة للسيارة كذلك البسيطة و يكونو عايشين فالغنى و الثراء الفااحش ما شااء الله !!!

لمحاتني خالتي سندس ابتاسمات و اتاجهات صوبي

سندس : بنتي حفصة مرحبا بييك الدار دارك و اعتابرينا والديك ^^

أنا : إا.. مم .. بارك الله فيك خالتي جزاك الله خيراا ،، واش بصح انتوما أغنياء !! و هاذا مقر سكناكم

سندس : ههه آه أبنتي ممكن يكون جاك عجب حيت حنا شعبيين و بساط سواءا فالملبس ديالنا ولا السيارة ^^ هكذا ابنتي حنا دايرين بحالنا بحال جمييع البشر و الفلوس ماكيغيرو والو لأننا ماكناش عايشين هكا من قبل و إنما فضل الله علينا مني خدمو أبنائنا و الحمد لله ^^ الانسان يستغل فلوسو و ثرواتو لي وهبها لي الله فيما يرضيه و فمساعدة الناس و الفقراء

يا سبحاان الله ماعمرني تصورت يكونو ناس أغنياء بهاد الصدى الطيب ما شاء الله تبارك الرحمن ،، فعلاا و تأكييدا لا زاال الخير في الأمة الإسلامية حتى يرث الله الأرض و من فيها .

آش غانقوول لكم دخت ما شااء الله الجردة قدها قد السخط كبييرة و فيها الورود و النباتات متنوعةة المسبح قدو قد الخيرية فين كنت و كبر كااع واو كيشهي تمشي تعوم فيه *-* ،، دخلنا للداخل أنا صافي فمي ماقدرتش نسدوو واو ما شااء الله الأرضية من الرخام اللامع وليت كانتمشا بشويةة خفت نخبشها هههه الأثاث كيدااير الديكورات بشااخ اللهم باارك دخت بمعنى الكلمة ،، مع الدخلة استقبلونا الخدم لي كانو لابسين لبسة موحدة و محتشمة بزااف ما شاء الله و كلهن محتجبات ^^ ،، رحبو بينا و قدموني لهم على أساس أني بنت من العائلة و ماشي بنت الميتم زادو كبرو فعيني هاد النااس عرفت أن الله واقف معايا و مامخلينيش تا لحظة و عرفت أن الله كبيير و زوين بزااا...اااف و مهما اشتد الكرب إلا و أن الفرج قرب و قرب بزاف ^^ ،، سي المعطي و خالتي سندس فينما يدورو يرحبوو بيا مساكن الله يخلي لهم صحيحتهم ،، دوروني فالفيلا كاملة او بالاحرى قصر ووراوني قنت بقنت الصراحة تعجبت بهاد الناس قمة التوااضع ماشي كيف كنت تانظن فالاول !!

طلعاتني خالتي سندس لواحد البيت الفوق او حسن نقولو جناح شقة صافي واااو كبييير اللهم باارك فيه ناموسية ينعسو فيها 8 مريحة بزااف الغطاء المخاد كولشي نقي و كيشعل أما بالنسبة للحمام ما شااء الله ماتسخاش تخرج منو فيه لوازم الاستحمام كااملة اضافة للكريمات و المرطبات و مجفف الشعر ،، فيه الدوش و الجاكوزي عجبني بزااف قمة الروعة

عمرني كنت كانحلم بهادشي فيوم من الأيام ولكن الإنسان مايفقدش الأمل ،، لا مستحيل مع الله أمره كلمح البصر إذا قال كن فيكوون فاطمئن يا بشر ..

شكرت خالتي سندس بزااف ولكن الشكر عمرو يقدر يعبر على الإمتنان ديالي لهاد الناس !! الله يجازيهم كل خير حسسوني كأني بنتهم و شخص منهم .. خلاتني خالتي نرتاح و هبطات عند زوجها أول ما درت سجدت سجدة شكر طوييلة ماكرهتش لو بقيت طول العمر ساجدة له عز وجل ^^ و كم مقصرين في حقك و عبادتك ياا رب غفراانك ،، بكيت لأني فعلا حسييت أن الله كيحقق ليا أحلامي ولكن أنا مقصرة بزااف من ناحيتو حاسبت نفسي جمعت راسي و عزمت أنني نجتاهد أكثر فأكثر في الطاعة ،، أول ما درت حيدت خماري و تقاشري و قفازاتي و دخلت توضيت خرجت صليت ركعتي شكر دعييت من قلبي لهاد الناس و هزيت كفوفي و طلبت الله يغفري و يتوب عليا ،، هزيت مصحفي لي جبتو معايا قريت شوية د القرآن و ارتاحييت صدق الله حين قال { ألا بذكر الله تطمئن القلوب } مهما حاولناا نقنعو أنفسنا أن السعادة فالمال و الرفاهية !! فاللعب و اللهو و الموسيقى و المعازف أبداا عمرنا نلقاو السعادة و الراحة أبدااا إلا مع الله و لله ^^ تقربوا من الله تطمئنو استغفروا الله ترتااحو ،، بقيت جالسة لمدة أستغفر و أستغفر من بعد نضت قاديت أغراضي و ملابسي و جمعت الروينة لي درت .

سمعت الدقان فالباب ..

أنا : تفضل ^^

كانت إحدى الخدم شابة فمقتبل العمر ذات ملامح برييئة شقراء جميلة ما شاء الله و زادها الحجاب نورا و جمالا و حياءا ، ابتاسمت لي ابتسامة جمييلة

الخادمة : آنسة حفصة ناداتك المدام سندس للعشاء و كيتسناوك تهبطي

أنا ( بادلتها نفس الإبتسامة ) : واخاا ختيتي ممكن دخلي دقيقة

الخادمة : آه واخا آنسة

أنا : حيدي عليك آنسة و حيدي الرسميات كولنا بشر و كولنا سواسية اوك عيطي عليا غيي حفصة

الخادمة : وااخا حفصة ^-^

أنا : آجي جلسي حدايا ،، قولي لي شنو سميتك عرفيني عليك دخلتي لخاطري ماكرهتش نكونو صديقات "

الخادمة : تاا أنا و الله ماعنديش صاحبتي '' المهم أنا سمر عندي 20 سنة كانسكن قريبة شوية لهنا كانجي فالصباح و كانمشي فالعشية

أنا : سمر ياا قمر ههه متشرفة بييك ،، اواا خالتي سندس و سي المعطي مهليين فيكم

سمر : بزاااف كثر ماتاتصوري ضريفين لأقصى درجة و تصوري معايا كاناكلو معهم فطبلة وحدة الصرااحة الله يخليهم لوليداتهم

أنا : ما شااء الله ^^ ،، أمم مزوجة ولا مخطوبة و لا بايرة فحالي هههه

سمر : هههه لاا والو واقيلة ماعارفينش تا واش عايشة ،،

بقينا شادين الهضرة أنا و سمر ماحسينااش بالوقت بنت ضريفة بزااف بلا قياس دخلات لقلبي وولينا صديقات داركنا الموقف بالضحك و نضت لبست خماري و تقاشري و القفازات و تمينا هابطينا أنا و سمر .. تبهرت اللهم بارك بالمائدة أشكال و أنواع من الأكل و الخدم كولهم و العساس كولشي مجمووع كعائلة كبييرة كولشي ضاحك ناشط ..

داخل جو من المرح انسجمت معهم بسهوولة ^^ حتا وليت كانبكي بالضحك خصووصا سي عمران العساس ديال القصر كيقتل بالضحك الله يخليه ديما نااشط ،،

سندس : بنتي حفصة قولي لي اشمن مستوى عندك فالدراسة ؟؟

أنا : عندي آخالتي الباكالوريا شديتها هاد العام بميزة حسن و الحمد لله

سندس : ما شااء الله عليك إواا مافكرتيش تكملي قرايتك ؟

أنا : كاين لي كره آخالتي غي الضرووف و ماعنديش الإمكانيات الحمد لله على كل حال

سندس : خيير إن شاء الله ؛أممم عندي ليك واحد المفاجئة ولكن ماشي داباا تيرارا هههه حتا يجيو ولادي ان شاء الله باقي لهم أسبوعين و يدخلو للمغرب ^^

أنا : 0.0 أسبووعين آخالتي حشومة علييك ههه جاني الفضوول ،، و الله يجيبهم على خيير يا رب

سندس : هههه مافيها بااس دغيا دووز ،، آميين يا ربي

تعشينا و لله الحمد تعرفت أكثرر على هاد العائلة الكبيرة كيما كاتقول خالتي ماشي خدم فقط و إنما أهل و عائلة '

عييت مع خالتي نخرج نقلب على خدمة و نكري و نستقل مانتقلش عليهم كثر من هكا ولكن والو ماخلاتنيش و آخر مرة جبدت معاها هاد الموضوع تقلقات مني !!،، ممكن تجيكم غريبة ولكن كانقولها و نعاودهاا مازال الخير و النس المزيانين في الأمة الاسلامية حتا تقوم السااعة '' نهار على نهار كانتعلق بيهم للحظة حسيت كأنهم واليديا ؛ تعلقت بيهم بزااف ^^ من أطيب خلق الله و أهم حااجة لاحظتها فيهم الدين الديين ما شااء الله تبارك الرحمن .

يوم جديد أحداث ووقائع مختلفة على باقي الأيام '' فقت على أشعة الشمس المتسللة من الستائر الشفافة ،، بعدما رددت دعاء الاستيقاظ من النوم توجهت نحو الشرفة ^^ طبعا كنت مرتدية ملابسي و حجابي ،، طليت و كان هدوء تاام ربما لم يستيقظو بعد اليوم الجو مختلف سخون بزااف أشعة حارقة ،، رفعت بصري للسماء و تأملت في خلق الله ، سبحانك يا بديع السماوات و الأرض ما أعظمك يا خالقي .. توجهت للحمام توضيت و رجعت صليت ركعتي الضحى الفجر طبعاا كانصليه فوقتو و من بعدو أذكار الصباح و القرآن { إن قرآن الفجر كان مشهودا } صدقت يا مولاي ..

اليوم عزمت ان شاء الله زيارة الميتم و ماما حكيمة ^^ توحشتها بزااف و نيت نطمئنها عليا .. لبست خماري فالرمادي قفازات في الأسود و كونفيرس أيضا فنفس اللون ،، اتجهت نحو الأسفل لقيت سمر و باقي البنات كيوجدو مائدة الإفطار عاونتهوم و بقينا كانهضرو و نضحكو و مجمعين .. التحقت بيها الخالة سندس و سي المعطي و باقي العائلة " فطرنا في جو عائلي حميمي لا فرق بيننا ^^

الخالة سندس : حبيبتي حفصة شفتك لابسة السبادري فين غادة ؟؟

أنا : نسييت آخالتي نا قلت لك بلي غانزور الميتم

الخالة سندس : مزياان آبنتي غانمشي معك شوقتيني نشوف حكيمة

اتجهناا للميتم فالسيارة الخاصة للخالة سندس ^^ سيارة بسييطة التواضع ما شاء الله ،، و صلت للميتم رجعات ليا الذكريات المرة و الحلوة الطفولة لي دوزتها هنا كوولشي ماحسيت الا و بزوج دمعات هبطو ليا مسحتهوم دغيا مابغيتش خالتي تشوفهم .. دخلنا و كانت مفاجئة كبيييرة لماما حكيمة بكات بالفرحة و الخوف عليا فنفس الوقت عاتباتني لأن ماتاصلتش بيها و ريحتها عليا عرفتها على خالتي سندس و الخير لي دارو فيا ،، اما خالتي سندس اكتفت بقول : بنتي حفصة تسللات لقلبي من أول نهار عرفتها ^^ قلبها بيض و صااافي ولو داكشي لي مر عليها ولكن نعم البنت الصالحة ما شاء الله و هاذا كيدل على تربيتك لها يا حكيمة كانحييك بصراحة لأنك عطيتينا أمل كبيير فبنات المستقبل و أمهات الحاضر .. دوزنا نهار زوين بزااف مع ماما حكيمة توحشتها بزااف و غانبقا ديما موحشاها ، توادعت معاها بالبكااء وواعدتها نزورها طبعاا في القريب إذا بقي في العمر بقيةة ..

مارجعناش للدار حينها لا و إنما مشينا للبحر وااو كيحمقني ^^ كانرتاح فيه بزااف كانحس بعظمة الخاالق سبحان الله .. شراتلي خالتوو سندس الصوفة يامي غزل البنات هههه كأني شي طفلة حسساتني بالاهتمام و الحنان و الحب .. ضحكنا و جمعنا عرفت عليها بزااف د الحوايج و هي أيضاا "

دخلنا للقصر فرحانة بزاااف و مرتاحة نفسيا الحمد لله ؛ اتجهت للغرفة ديالي نتوضا لأنه قرب آذان المغرب بدلت عليا حتا كانسمع الآذان ،، صلييت و لله الحمد وهبطت للتحت عند الكل ...

دازو أسبوعين طايريين !! سرعة الايام مخيفة!

ما إن أضع رأسي على الوسادة إلا وأشرق نور الفجر..

ما إن أستيقظ إلا وحان موعد النوم..

تسير أيامنا و لا تتوقف !

وأقول في نفسي : حقاً السعيد من ملأ صحيفته بالصالحات ..

- والسؤال الذي أقف عنده بماذا ملئت صحيفتي !؟

وهل أنا أسير للأمام أم للخلف !؟

يا ترى ما هو وزني عند الله!؟

أقف وأحاسب نفسي فالأيام تمشي بسرعة ولن يبقى إلا العمل الصالح

فتن الدنيا تموج بنا والأحداث تتسارع من حولنا والأموات يتسابقون أمامنا..

" "فَفِرُّوا إِلَى اللَّهِ ۖ إِنِّي لَكُمْ مِنْهُ نَذِيرٌ مُبِينٌ"

هناك اناس رسموا في قلوبنا

وسام لايتغير بتغير الاحوال

فهو ثابت ثبوت الجبال　

☆ 　☆ ☆ 　☆

وهناك اناس تركوا في قلوبنا

بصمة بكلمة جميلة

اوعبارة شيقة اونصيحة قيمة

أو ذكرى طيبة

ومهما ابتعدوا وذهبوا

فاننا نذكرهم كلما لاح طيفهم ..

وهناك اناس رسموا في قلوبنا

ومضة جميلة ونسمة رقيقة

وضحكة بريئة لايشوبها غش ولاخداع ....

هو ذاك الشعور الفضيع الذي تسلل لقلبي دون استئذان ،، أخشى أن أضيع كرة أخرى ؛ أخشى أن أفقد أولائك الذين طبعوا في قلبي ذكذى جميلة و صورة رائعة ...

خايفة لا مايتقبلونيش أولاد الخالة سندس ؛ مابغيتش نخلق شي مشكل بينها وولادها أو ينوض شي صداع نكون أنا المصدر ديالو إاه يا رب كن لي عونا يا ذا الجلال و الإكرام ..

استغفرت الله و حاولت نبعد عليا الأفكار و الوساوس الخبيثة و تلبيس إبليس نعوذ بالله منه و من شره ، بقيت جالسة فبيتي و ساهية خايفة بزااف من المجهول القادم خايفة نتشرد مرة أخرى أو بالأحرى دائما هاد الإحساس و الشعور ينتابني و كيف لا و أنا بنت ميتم و خيرية ماعارفاش راسي هل أنا لقيطة أم بنت الحلال '' راسي غاينفاجر بدون شك

نضت فورا توضيت و صليت قيام الليل دعيت ربي هو الوحيد لي حاس بيا من أعمااق أعماق قلبي و متأكده أنه تعالى سيستجييب لي و لو طال الأمد ؛ تلوت الورد اليومي من القرآن ارتاحيت و لله الحمد بديت كانوجد فراشي باش نعس في انتظار يوم جديد يوم الحسم بالنسبة لي .. في انتظار قدوم الأبناء لي غايوصلو صباحا ؛ و هادشي الا فقت و إذا توفاني الله أسأله أن يرحمني برحمته التي وسعت كل شيء .

كان النبي يوسف عليه السلام مسجونًا ومعه شابان آخران،،

كان يوسف الأجمل قلبًا وقالباً

لكن الله أخرجهم قبله !!

وظل هو رغم كل مميزاته بعدهم في السجن بضع سنين،

الأول: خرج ليصبح خادمًا

والثاني: خرج ليُصلب!

ويوسف انتظر كثيرًا

لكنه خرج ليصبح عزيز مصر !!

إلى كل الذين تتأخر أمانيهم،

ما أخذه الله لحكمة، وما أبقاه لرحمة

قد تتأخر الأماني لتكثر العطايا..

"فأحسنوا الظن بالله"

أصبحنا و أصبح الملك لله ^^ ،، نضت كولي تفاؤل أمل بل متأكدة أن الله سيجعل لي من أمري مخرجاا ،، نضت ما خايفاش من القادم لأني فوضت أمري لله إذن لاا خوف .. نضت بابتسامة اطمئنان توضيت صليت ركعتي الضحى ..

أطللت في الشرفة داعبتني نسائم الصباح النقية و الشمس المشعة لتعلن عن يوم حاار ،، أرحت بصري قليلا و إذا بي كانسمع الهضرة لتحت كثييرة إذا وصلوا !! بما أن الشرفة ديال الغرفة ديالي جات وراء الفيلا ما شفتهوم مني جاو .. هزيت كتافي بمعنى لي ليها ليها و بقيت فالشرفة ديالي أتمتع بخلق الله البديع يا سبحانك يا الله '

و إذا بي أسمع طرق خفيف على باب غرفتي أممم ماشي ديال سمر و لا حتى ديال شي احد آخر من العائلة غاتجيكم غريبة ههه ولكني وليت حافظة الطراق ديال كل واحد عن ظهر قلب ..

أنا : تفضل !!

شابة في مقتبل العمر زويينة اللهم بارك ملامح الحشمة و الوقار و لو لسنها الصغير ' نوور على وجهها اللهم بارك بابتسامة برييئة و مريحة بلباس شرعي نعم خماار هاذا لي فاجئني !

الشابة : السلام عليكم و رحمة الله حفصة لاباس علييك

أنا : إاا .. الحمد لله تفضلي ماتبقايش فالباب

أغلقت الباب و اتجهت نحوي باستحياء و ثبات و بابتسامة مشرقة ما شااء الله من تكون ؟

تقدمت نحوي و سلمات عليا و كأنها كاتعرفني من زماان ؛ جلسنا أنا وياها فوق السرير و بقيت كانشوف فيها كانتسنا تبدا ههه خصوصا طبعي حشومي مع الناس الغراب عليا

الشابة : أمم الجو غزاال هنا فالمغرب ماشي بحال فرنسا الغربة صعييبة

أنا : آاه طبعا خصووصا مني كاتعيش فمجتمع غريب عليك فكلشي فالديانة فالثقافة ...

الشابة : ما علينا غيير الصبر هذا هو القدر ديالنا الحمد لله ^^

انا : طبعاا و لله الحمد فيها خيير

الشابة : حفصة يا حفصة تمااما كما قالت ليا عليك خالتي سندس تبارك الله عليك جمال ظاهري و باطني الله يحجبك من كل شر

أنا : آمييين بارك الله فيك ختيتي ،، و الحمد لله على سلامتكم و مرحبا بكم فبلادكم

الشابة : لهلا يخطيك الحبيبة ^^ ،، أناا حسناء 20 سنة زوجة الإبن الأصغر جلال فعمرو حاليا 28 سنة ، اواا كانعيشو ففرنسا بالضبط فباريس عندي بنيتة فعمرها عام و نصف '

أنا : متشرفيين حسناء صراحة اسم على مسمى متوقعتش كاع تكوني هكاا الله يخليكم لبعض و يخلي ليك بنتكم و ينبتها نباتا حسنا

حسناء : اللهم آميين ياا رب ،، أنت حفصة حفوصة 18 عاام راني كانعرفك ههه لهلا يخطي خالتي كاظل تشكر فيك و تمدح فيك كنت متشوقة نشوفك و مشتااقة لوجهك الكريم داكشي لاش قرقبت علييك

أنا : تشتاق لك الجنة حبيبتي الله ينورك و بالعكس فوجتي عليا و دخلتي لقلبي دغياا

بقيت مجمعة مع حسناء تعرفت عليها أكثر فأكثر بنت طيبة بزااف ذات شخصية مرحة و قلب صافي ينبض بنور الله ' اكتشفت علمها الشرعي الكثير ما شاء الله حنونة بزااف اندمجت معاها و تطلقت دغياا عاودت لها الصغييرة و الكبيرة ماعرفتش ولكن حسيت كأنني وجدت أخت !! بقينا كانضحكو و مجمعين عرفاتي على باقي أفراد العائلة لي كاتكون من الإبن الأكبر مصطفى 39 سنة عندو شركة كبييرة و معروفة عالميا فتولوز حيث تما أيضا مكان الإقامة ديالو مع الزوجة ديالو فاطمة الزهراء 35 سنة لي خدامة أيضا معه فالشركة إضافة للأبناء ديالهم ماهر و ياسمين لي هوما فالأصل توأم ،، أما الإبن الأوسط علي 32 سنة مقيم و خدام أيضا فإحدى المحلات التجارية الكبرى كمدير و مسؤول فمارسيليا الزوجة ديالو كارمن أجنبية أسلمت و الحمد لله ربة بيت مع الطفل ديالهم كريم ..

ماحسيتش بالوقت مع حسناء داز دغياا حتا طلعات خالتي سندس باش تهبطنا منها نيت نتعرف عليهم أقصد النساء ^

هبطت و إذا بالمفاجئة !! الزوجات الاخرين عكس حسنااء تماما ' فاتو التبرج لهيه ملابس لا حول ولا قوة الا بالله كيلو د المكياج !! .. خالتي و عمي المعطي جالسين و ماعاجبهمش الحال لاحظتها من خلال شوفاتهم و هضرتهم ،، قهقهاتن المتعالية و الريحة لي دايرات دوخاتني أما حركاتهم بدون تعليق لا إله إلا الله زعما تصدمت و تفاجئت !! دخلت ألقيت السلام و تاحد ما جاوب من غي خالتي و عمي اختلقت لهم أعذار ممكن يكونو ما سمعونيش ،، ماعبرونيش و كملو هضرتهم كأنني غير موجودة ، داركات خالتي الأمر و أنقذت الموقف و ظاهر عليها الغضب من تصرف أولادها

خالتي : بنتي حفصة دخلي ماتحشميش

أنا : واخا اخالتي ^^

دخلت ولاحظت شوفاتهم الناقصة و المستفزة كأنني شيء منبوذ و بلاصتو ماشي هناا !! ألقيت السلام على الرجال غير بالاشارة بينما مديت وجهي لنساءهم و قمعوني و عطاوني غير يديهم كأنهم مشمإزين مني أو شي حاجة رخيصة موسخة !! بقا فيا الحال بزاااف حين أن حسناء جلسات حدايا كاتصبرني أما زوجها جلال رحب بيا بحرارة و فرح بيا الصراحة كيستتهلو بعض و جاو مع بعضهم ^^

لاحظت بلي شوفات مصطفى و علي ماكاتطمأنش أما زوجاتهم كيوشوشو بيناتهم و يطلعوني و يهبطوني و يضحكو بسخرية !!