قصة بالدارجة المغربية صاحبة اللسان الطويل

الجزء  1 

بعد ما شفت إعلان ديال الخدمة فأحد المواقع قررت نمشي نجرب زهري العوج يقدر هاد المرة يتقاد تقاديت لبست أحسن ماعندي كسوتي زرقة وطلبت الله يسهل عليا , فاش وصلت قالولي هوما مامحتاجينش انفوجرافيست (مصممة إعلانات) ولكن محتاجين للي يطبع ليهم لوراق وقلت ليهم مم موافقة حيت كنت محتاجة الخدمة بزاااف من بعد ما تقبلت بديت معاهم الخدمة داك سيمانة. فسيمانة وحدة عرفت شركة كاملة تقريبا حيت جيت فبلاصة حاضية كولشي وكولشي كايجي عندي نطبع ليه أو بمعنى أخر ندير ليهم فوطوكوبي ههه على أخر ايامي من بعد ماخديت الباك وقريت عامين ديال ليسطيا وليت مولات الفوطوكوبي ناس عندهم زهر وأنا عندي زمر المهم هدا النحس العملي اجي تشوفو نحس الشخصي من بعد واحد نهار عامر بتمارة دخلت لدار مدكدكة يلاه جلست وأنا نسمع زغاريت محسيتش براسي تلقيت راسي كنطل من سرجم - ميييي زغاريت كيجيو من العمارة لي فراس درب من طاج رابع من عند خالتي حليمة أأأأش واقع ؟؟؟؟ - على مافخباركش بنتها نبيلة تخطبات بواااااحد راجل سيد رجال راكابيا فشلو عليا هاديك نبيلة الفليفلة لي كانت دراري ديال الليسي كاملين تصاحبات معهم تخطبات وأنا لي داخلة سوق راسي عمرو مدق عليا شي حد بان ليا تأنا نخرج طريق نشوف غير سعدهم - أش خدام؟ - كيبيع تقلية أش عرفني أنا - مشبهتيش فبنتك أماما أنا نجيبلك خباروا هاااد ليلة داك ليلة نيت خرجت لمارشي معا غيتة و ماجدة أعز صحاباتي من الاعدادي حجة وزيارة منها نشري شي كسوة حيت هاديك زرقة لي عندي كشفات منين دخلت لداك شريكة و أنا لبساها ومنها نعرف قصة نبيلة الفليفلة غيتة كتجيب لخبار و ماجدة كتنسق لخبار جديدة مع لقديمة وأنا كنحلل وكندير إعادة تصدير هه الله يهدينا وصافي- غيتة: إيوا أجنية شديتي لخدمة أومقبيتيش كتعرفينا - أنا : للي يسمعك يقول خدامة فصناعة النووي وراه كندير غير فوطوكوبي - ماجدة : كيداير المدير ديال الشركة واش زوين شوفي ليا معاه أ وريدتي ولا عطيني غير الفايس ديالو - أنا : خرجو عليكم روايات عبير و أحلام عقلتي على المدير ديال المدرسة الابتداٍئي قرع وغليظ وراسو شايب و غواتو سابقوا ايوا راه توأم ديالو خليونا من هاد زعتر نبيلة الفليفلة شكون هداك راس البندير لي داها - غيتة : اسم منعم العمر 24 المهنة خدام فمقاطعة شحال كيشد فلتات ليا تعرفات عليه فالفايسبوك و تلاقاتو فالمقاطعة - أنا : ناري مشات عندو تال الخدمة وجها قاصح - ماجدة : ايوا الله يعطينا زهر الخايبات - أنا : أوديييي خايبة أُوماعندي زهر 

فقت الصباح فرحانة بكسوتي جديدة ولكن غير تفكرت طوبيس للي تابعني جمعت ضحكة وصلت لشركة لقيت قشلة ديال لوراق كيتسناوني أنا بغيت لهاد شركة فاييت ياربي يعطيوني التعويض نجلس فدارنا بقيت من 09 تال 11 وانا كنطبع فداك لوراق وليت كنخدم كتر من الماكينة يالاه بغيت نرتاح بديت كنشم واحد ريحة باينة عليها غالية خفيفة - شوية - مجهدة هزيت راسي لقيت سيكريتيرا ديال المدير صبْحنا على الله - بغيتك تكتبي لياهاد لوراق و تبدلي الأرقام للي مضروب عليهم وتطبعيهم بغيتهم قبل لبْوسْ ديال الغدا يكونو محطوطين فالبيروا ديالي أوكي - (بغيت الحيط يضربك لداك الكمارة) ولكن انا مكلفة هنا غير بطبيع - لي قبل منك كانت كادير كولشي أو ياك أنت أنفوجرافيست ايوا ضبري راسك لاحت ليا لوراق فوق طبلة اوخرجات الله يخرج ليها العقل يخخخ يالاه بغيت نرتاح أوف بديت كنكتب فيهم تا وصلات 2 أو وصلات ليا لقردة لراس مشيت كنسول على البيرو ديالها لقيتو فطاج لخر عرفت لبيرو ديالها غي بريحتها لقيتها مزال مجات لحت ليها لوراق فوق طبلة بنفس طريقة لي لاحتهوم ليا هيا - الله يعدبها كي عدباتني أنا بغيت ليها ياااا ربي نهار عرسها يهرب ليها لعريس أمين - احم احم أش كديري انتي هنا(بنبرة الاحتقار) جاني صوت ديال راجل من لور تصدمت درت دورة طوبيس قلبي بدا كيضرب عنداك غير يكون سمعني هو راجل في مقتبل العمر طويل وسمر شويا مبرونزي او صافي - أش بان ليك كنبيع دنجال ولا لفلفلة (بنبرة الاستهزاء) يلاه بغا ينطق اوهي دخل داك المصيبة ديال سكريتيرا قالت ليا - أش كديري انتي هنا - خدمتك أمدام لي قلتي ليا نخدمها ليك هاهي خدمتها وهانا حطيتها ليك قبل مارجعتي من البوس ديال الغدا شفتها بدات كتلون وداك سلوم لي كان مزال واقف كيخنزر فيا او فيها وأنا نخرج قبل ما يصفيوها ليا المهم رديت ليها صرف غير بلاتي الا موصلاتش خبارها لعمي المدير أنا مانتسماش علال الفْرْشَة نهار لول كيموت المش وأنا غنوريها سلوغية كدايرة يلاه وصلت بغيت نرتاح أو نتغدى شحال مشهية دنجال و لفلفة ممممم - اختي رانيا عافاك طبعيليا غير هاد لوريقات بزربة - خويا سعيد نتغدى ونطبع ليك داك القشلة ديال لوراق راه اختك باقي مداقتش النعمة - عافاك أختي راه غايجريوا عليا الى ملقاوش الخدمة واجدة - غير أجي وجري وعلاش على فوطوكوبي أرا داك لوراق ههه وبدينا كنضحكو على مكيتطبعو لوراق تكنسمعو واحد صوت كيغوت علينا - أش كاديرو نتوما جوج دري لي كان معايا سلت معرفت منين داز خلا وراقو وزاد هزيت راسي لقيت هاداك راجل لي كان فلبيرو ديال سكرتيرا - ماتمشاش ليا دنجال وليت كنبيع الخرشف غير بغا يهضر وللمرة تانية محالفوش الحظ صونا عليه تيليفون أو مشا مشية بلا رجعة - سي سعيد فين علقتي - شنو بغا رئيس الشركة ؟؟ - رئيس كفاش ؟؟ - للي كان واقف هنا راه هو مول الشركة - هههه عندكم الرئيس و المدير هادي ماشي شركة هادي جمهورية غينيا الاستوائية شد شد وراقك راه انا ليوم لي غايجريو عليا خدا وراقو او مشى أو مشات معاه خدمتي جلست من كترة صدمة و جوع و بديت كنفكر واش غادي يخلصوني على هاد نص شهر نرد غير الكريدي ديال هاد الكسوة الي داخلة عليا بنحس وصلات 4 ماجا عندي حد هزيت صاكي وهربت 

فقت صباح بكري مخلوعة وخايفة ملي جاي بحال لغادي ندوز لباك أشنو هي أسوأ حاجة تقدر توقع يجريو عليا كيف لقيت هاد الخدمة نلقى غيرها ربي كبييير هادشي باش صبّرت راسي وخرجت من دار وصلت لشركة ملقيت تا ورقة كتسناني و الموظفين كيضحكوا ناري ياكما كيضحكو عليا وواحد منهوم بدا كيقوليا - هانتي ألالة رانيا غتشبعي راحة وجهي ولا بيض مشى منو لون الله ياربي الله دنيا كولها ساقت ليا الخبار جات عندي خديجة موظفة مكلفة بالحسابات - مالكي ياك لباس خصكي تفرحي الرئيس و سيكريتيرتو سافرو الباريس عندهم شي اتفاقية ديال شركة جوووج سيمانات سعداتها بنت الهم وسعداتنا تاحنا نخدمو مرخوفين جوج سيمانات غانكون كملت شهري وأخيرا ابتسم لي الحظ الحمد الله دازت سيمانة دغيا نادرا فين كيجيب ليا شي حد شي ورقة صدق من قال “غير كيغيب القط كيديروا الفئران ما هان عليهم ” و حتى داك المدير غير محطوط ديكور حيت كان صاحب بات مول الشركة ومجاتش يجريو عليه ,,, شركة كولها خرجات تغدا أو حيت أنا ميزانيتي مكاتسمحش ناكل برا كنصلق بيضة ونجيبها نتغدى بيها حسيت بالملل لدرجة مليت الفايسبوك وحليت المزرعة السعيدة وبديت كنحصد أونزرع ونوكل البقر هه - أش كاديري ؟؟؟ - كنعلف البقر اشكاندير درت نص دورة فيه هييييييي مول شركة ليوم يدبحني أنا و البقر - حسابي معاك هو الخر فينهوما الموظفين ؟؟؟ - ممممشاو يعلفوا أأأأ يتغداو - كولهوم جوج ونص هادي فات البوس ديال الغدا بنص ساعة - نمشي نعيط ليهوم - واش نتي حمقة تبعيني دابا لبيرو ديالي باقي مكملش دورة وهي تقول البقرة لي فالمزرعة مممممووووووو خنزر فيا وااااحد تخنريرة كون كانو شوفات كيقتلو كون قتلني سديت فايسبوكي وتبعتو بزربة دخلت لقيتو كيكتب فشي ورقة باينة ديال طرد الفوري ديالي :’( - قلبي ليا على هاد دوسيات بزربة بغيتهم يكونو عندي فدقيقة أوييلي فين غادي نقلب عليهم بديت كنشوف فالبيرو ديال سيكريترتو جاب الله مرتبة دوسيات بالحروف لقيتهم بزربة أديتهوم ليه عطاني كمشة ديال لوراق تاني - صحي الأرقام بالأرقام لي مكتوبين بستيلو واستعملي لاتوب ديال صوفيا (سيكرتير ا) غابيد أش هاد زهر كنا مرتاحين تا نزلات لينا حجرة فوق راس كتبتهوم وطبعتهوم وديت هوم ليه - ناري نلقى غلاط واحد ليوم تدفعي تمن فعايلك بدوبل هيييييي زاد عطاني قشلة ديال لوراق ناري الى قالي صحيهوم غادي نموت ليه هنا - طبعيهوم وجمعيهوم على شكل دوسيات نزلت باش نطبعهوم لقيت الموظفين باقيين مقصريين - سكووووت راه مول اللبن أأأ الشركة حالف عليكم واحد بالواحد تعطلتو نص ساعة فالبوس ديال الغدا - حلفيييي - و حق سيدي ربي وراه بدا ينتقم مني أنا لولا حل سكوت مفاجئ وكل واحد تخشى فالبوسط ديالو وصلات ل 5 وأنا باقة كنستف فداك الوراق سليتهم عطيتهم ليه كان باين فيه العيا واحتى أنا عييت - شاف بغيت نمشي بحالي - أُوكي ولكن أجي غدا ان شاء الله مع 8 نلقاك هنا والى تعطلتي غير بلا متدخلي - وسيكريترتك؟؟ - باقا فباريس فمؤتمر مغاتجي تال سيمانة جايا وانتي غتخدمي بلاصتها - ولكن مكانعرفش نخدم خدمتها - لسانك طويل وأش كتعرفي ديري تلعبي مع البقر الى مبغتيش تجي متجيش نهائيا بسلامة - بسلامة يخ على مووووصيببة كتعرفو غيير غتخدمي بلاصتها ماشي تشدي خلصتها

• غرّد
• شارك
• شارك
• شارك
• شارك